[II Reges 1]
{1:1} Pręvaricatus est autem Moab in Israel, postquam mortuus est Achab.
{1:2} Ceciditque Ochozias per cancellos cnaculi sui, quod habebat in Samaria, et ęgrotavit: misitque nuncios, dicens ad eos: Ite, consulite Beelzebub deum Accaron, utrum vivere queam de infirmitate mea hac.
{1:3} Angelus autem Domini locutus est ad Eliam Thesbiten, dicens: Surge, et ascende in occursum nunciorum regis Samarię, et dices ad eos: Numquid non est Deus in Israel, ut eatis ad consulendum Beelzebub deum Accaron?
{1:4} Quam ob rem hęc dicit Dominus: De lectulo, super quem ascendisti, non descendes, sed morte morieris. Et abiit Elias.
{1:5} Reversique sunt nuncii ad Ochoziam. Qui dixit eis: Quare reversi estis?
{1:6} At illi responderunt ei: Vir occurrit nobis, et dixit ad nos: Ite, et revertimini ad regem, qui misit vos, et dicetis ei: Hęc dicit Dominus: Numquid, quia non erat Deus in Israel, mittis ut consulatur Beelzebub deus Accaron? Idcirco de lectulo, super quem ascendisti, non descendes, sed morte morieris.
{1:7} Qui dixit eis: Cuius figurę et habitus est vir ille, qui occurrit vobis, et locutus est verba hęc?
{1:8} At illi dixerunt: Vir pilosus, et zona pellicea accinctus renibus. Qui ait: Elias Thesbites est.
{1:9} Misitque ad eum quinquagenarium principem, et quinquaginta qui erant sub eo. Qui ascendit ad eum: sedentique in vertice montis, ait: Homo Dei, rex pręcepit ut descendas.
{1:10} Respondensque Elias, dixit quinquagenario: Si homo Dei sum, descendat ignis de cęlo, et devoret te, et quinquaginta tuos. Descendit itaque ignis de cęlo, et devoravit eum, et quinquaginta qui erant cum eo.
{1:11} Rursumque misit ad eum principem quinquagenarium alterum, et quinquaginta cum eo. Qui locutus est illi: Homo Dei, hęc dicit rex: Festina, descende.
{1:12} Respondens Elias ait: Si homo Dei ego sum, descendat ignis de cęlo, et devoret te, et quinquaginta tuos. Descendit ergo ignis de cęlo, et devoravit illum, et quinquaginta eius.
{1:13} Iterum misit principem quinquagenarium tertium, et quinquaginta qui erant cum eo. Qui cum venisset, curvavit genua contra Eliam, et precatus est eum, et ait: Homo Dei, noli despicere animam meam, et animas servorum tuorum qui mecum sunt.
{1:14} Ecce descendit ignis de cęlo, et devoravit duos principes quinquagenarios primos, et quinquagenos, qui cum eis erant: sed nunc obsecro ut miserearis animę meę.
{1:15} Locutus est autem Angelus Domini ad Eliam, dicens: Descende cum eo, ne timeas. Surrexit igitur, et descendit cum eo ad regem,
{1:16} et locutus est ei: Hęc dicit Dominus: Quia misisti nuncios ad consulendum Beelzebub deum Accaron, quasi non esset Deus in Israel, a quo posses interrogare sermonem, ideo de lectulo, super quem ascendisti, non descendes, sed morte morieris.
{1:17} Mortuus est ergo iuxta sermonem Domini, quem locutus est Elias, et regnavit Ioram frater eius pro eo, anno secundo Ioram filii Iosaphat regis Iudę: non enim habebat filium.
{1:18} Reliqua autem verborum Ochozię, quę operatus est, nonne hęc scripta sunt in Libro sermonum dierum regum Israel?
[II Reges 2]
{2:1} Factum est autem, cum levare vellet Dominus Eliam per turbinem in cęlum, ibant Elias et Eliseus de Galgalis.
{2:2} Dixitque Elias ad Eliseum: Sede hic, quia Dominus misit me usque in Bethel. Cui ait Eliseus: Vivit Dominus, et vivit anima tua, quia non derelinquam te. Cumque descendissent Bethel,
{2:3} egressi sunt filii prophetarum, qui erant in Bethel, ad Eliseum, et dixerunt ei: Numquid nosti, quia hodie Dominus tollet dominum tuum a te? Qui respondit: Et ego novi: silete.
{2:4} Dixit autem Elias ad Eliseum: Sede hic, quia Dominus misit me in Iericho. Et ille ait: Vivit Dominus, et vivit anima tua, quia non derelinquam te. Cumque venissent Iericho,
{2:5} accesserunt filii prophetarum, qui erant in Iericho, ad Eliseum, et dixerunt ei: Numquid nosti quia Dominus hodie tollet dominum tuum a te? Et ait: Et ego novi: silete.
{2:6} Dixit autem ei Elias: Sede hic, quia Dominus misit me usque ad Iordanem. Qui ait: Vivit Dominus, et vivit anima tua, quia non derelinquam te. Ierunt igitur ambo pariter,
{2:7} et quinquaginta viri de filiis prophetarum secuti sunt eos, qui et steterunt econtra, longe: illi autem ambo stabant super Iordanem.
{2:8} Tulitque Elias pallium suum, et involvit illud, et percussit aquas, quę divisę sunt in utramque partem, et transierunt ambo per siccum.
{2:9} Cumque transissent, Elias dixit ad Eliseum: Postula quod vis ut faciam tibi, antequam tollar a te. Dixitque Eliseus: Obsecro ut fiat in me duplex spiritus tuus.
{2:10} Qui respondit: Rem difficilem postulasti: attamen si videris me, quando tollar a te, erit tibi quod petisti: si autem non videris, non erit.
{2:11} Cumque pergerent, et incedentes sermocinarentur, ecce currus igneus, et equi ignei diviserunt utrumque: et ascendit Elias per turbinem in cęlum,
{2:12} Eliseus autem videbat, et clamabat: Pater mi, pater mi, currus Israel, et auriga eius. Et non vidit eum amplius: apprehenditque vestimenta sua, et scidit illa in duas partes.
{2:13} Et levavit pallium Elię, quod ceciderat ei: reversusque stetit super ripam Iordanis,
{2:14} et pallio Elię, quod ceciderat ei, percussit aquas, et non sunt divisę. et dixit: Ubi est Deus Elię etiam nunc? Percussitque aquas, et divisę sunt huc, atque illuc, et transiit Eliseus.
{2:15} Videntes autem filii prophetarum, qui erant in Iericho econtra, dixerunt: Requievit spiritus Elię super Eliseum. Et venientes in occursum eius, adoraverunt eum proni in terram,
{2:16} dixeruntque illi: Ecce, cum servis tuis sunt quinquaginta viri fortes, qui possunt ire, et quęrere dominum tuum, ne forte tulerit eum Spiritus Domini, et proiecerit eum in unum montium, aut in unam vallium. Qui ait: Nolite mittere.
{2:17} Coegeruntque eum, donec acquiesceret, et diceret: Mittite. Et miserunt quinquaginta viros: qui cum quęsissent tribus diebus, non invenerunt.
{2:18} Et reversi sunt ad eum: at ille habitabat in Iericho, et dixit eis: Numquid non dixi vobis: Nolite mittere?
{2:19} Dixerunt quoque viri civitatis ad Eliseum: Ecce habitatio civitatis huius optima est, sicut tu ipse domine perspicis: sed aquę pessimę sunt, et terra sterilis.
{2:20} At ille ait: Afferte mihi vas novum, et mittite in illud sal. Quod cum attulissent,
{2:21} egressus ad fontem aquarum, misit in illum sal, et ait: Hęc dicit Dominus: Sanavi aquas has, et non erit ultra in eis mors, neque sterilitas.
{2:22} Sanatę sunt ergo aquę usque in diem hanc, iuxta verbum Elisei, quod locutus est.
{2:23} Ascendit autem inde in Bethel: cumque ascenderet per viam, pueri parvi egressi sunt de civitate, et illudebant ei, dicentes: Ascende calve, ascende calve.
{2:24} Qui cum respexisset, vidit eos, et maledixit eis in nomine Domini: egressique sunt duo ursi de saltu, et laceraverunt ex eis quadraginta duos pueros.
{2:25} Abiit autem inde in montem Carmeli, et inde reversus est in Samariam.
[II Reges 3]
{3:1} Ioram vero filius Achab regnavit super Israel in Samaria anno decimo octavo Iosaphat regis Iudę. Regnavitque duodecim annis.
{3:2} Et fecit malum coram Domino, sed non sicut pater suus et mater: tulit enim statuas Baal, quas fecerat pater eius.
{3:3} Verumtamen in peccatis Ieroboam filii Nabat, qui peccare fecit Israel, adhęsit, nec recessit ab eis.
{3:4} Porro Mesa rex Moab, nutriebat pecora multa, et solvebat regi Israel centum millia agnorum, et centum millia arietum cum velleribus suis.
{3:5} Cumque mortuus fuisset Achab, pręvaricatus est fdus, quod habebat cum rege Israel.
{3:6} Egressus est igitur rex Ioram in die illa de Samaria, et recensuit universum Israel.
{3:7} Misitque ad Iosaphat regem Iuda, dicens: Rex Moab recessit a me, veni mecum contra eum ad pręlium. Qui respondit: Ascendam: qui meus est, tuus est: populus meus, populus tuus: et equi mei, equi tui.
{3:8} Dixitque: Per quam viam ascendemus? At ille respondit: Per desertum Idumęę.
{3:9} Perrexerunt igitur rex Israel, et rex Iuda, et rex Edom, et circuierunt per viam septem dierum, nec erat aqua exercitui, et iumentis, quę sequebantur eos.
{3:10} Dixitque rex Israel: Heu heu heu, congregavit nos Dominus tres reges, ut traderet in manus Moab.
{3:11} Et ait Iosaphat: Est ne hic propheta Domini, ut deprecemur Dominum per eum? Et respondit unus de servis regis Israel: Est hic Eliseus filius Saphat, qui fundebat aquam super manus Elię.
{3:12} Et ait Iosaphat: Est apud eum sermo Domini. Descenditque ad eum rex Israel, et Iosaphat rex Iuda, et rex Edom.
{3:13} Dixit autem Eliseus ad regem Israel: Quid mihi et tibi est? vade ad prophetas patris tui, et matris tuę. Et ait illi rex Israel: Quare congregavit Dominus tres reges hos, ut traderet eos in manus Moab?
{3:14} Dixitque ad eum Eliseus: Vivit Dominus exercituum, in cuius conspectu sto, quod si non vultum Iosaphat regis Iudę erubescerem, non attendissem quidem te, nec respexissem.
{3:15} Nunc autem adducite mihi psaltem. Cumque caneret psaltes, facta est super eum manus Domini, et ait:
{3:16} Hęc dicit Dominus: Facite alveum torrentis huius fossas, et fossas.
{3:17} Hęc enim dicit Dominus: Non videbitis ventum, neque pluviam: et alveus iste replebitur aquis, et bibetis vos, et familię vestrę, et iumenta vestra.
{3:18} Parumque est hoc in conspectu Domini: insuper tradet etiam Moab in manus vestras.
{3:19} Et percutietis omnem civitatem munitam, et omnem urbem electam, et universum lignum fructiferum succidetis, cunctosque fontes aquarum obturabitis, et omnem agrum egregium operietis lapidibus.
{3:20} Factum est igitur mane, quando sacrificium offerri solet, et ecce, aquę veniebant per viam Edom, et repleta est terra aquis.
{3:21} Universi autem Moabitę audientes quod ascendissent reges ut pugnarent adversum eos, convocaverunt omnes qui accincti erant balteo desuper, et steterunt in terminis.
{3:22} Primoque mane surgentes, et orto iam sole ex adverso aquarum, viderunt Moabitę econtra aquas rubras quasi sanguinem,
{3:23} dixeruntque: Sanguis gladii est: pugnaverunt reges contra se, et cęsi sunt mutuo: nunc perge ad prędam Moab.
{3:24} Perrexeruntque in castra Israel: porro consurgens Israel, percussit Moab: at illi fugerunt coram eis. Venerunt igitur qui vicerant, et percusserunt Moab,
{3:25} et civitates destruxerunt: et omnem agrum optimum, mittentes singuli lapides, repleverunt: et universos fontes aquarum obturaverunt: et omnia ligna fructifera succiderunt, ita ut muri tantum fictiles remanerent: et circumdata est civitas a fundibulariis, et magna ex parte percussa.
{3:26} Quod cum vidisset rex Moab, pręvaluisse scilicet hostes, tulit secum septingentos viros educentes gladium, ut irrumperent ad regem Edom: et non potuerunt.
{3:27} Arripiensque filium suum primogenitum, qui regnaturus erat pro eo, obtulit holocaustum super murum: et facta est indignatio magna in Israel, statimque recesserunt ab eo, et reversi sunt in terram suam.
[II Reges 4]
{4:1} Mulier autem quędam de uxoribus prophetarum clamabat ad Eliseum, dicens: Servus tuus vir meus mortuus est, et tu nosti quia servus tuus fuit timens Dominum: et ecce creditor venit ut tollat duos filios meos ad serviendum sibi.
{4:2} Cui dixit Eliseus: Quid vis ut faciam tibi? Dic mihi, quid habes in domo tua? At illa respondit: Non habeo ancilla tua quidquam in domo mea, nisi parum olei, quo ungar.
{4:3} Cui ait: Vade, pete mutuo ab omnibus vicinis tuis vasa vacua non pauca.
{4:4} Et ingredere, et claude ostium tuum, cum intrinsecus fueris tu, et filii tui: et mitte inde in omnia vasa hęc: et cum plena fuerint, tolles.
{4:5} Ivit itaque mulier, et clausit ostium super se, et super filios suos: illi offerebant vasa, et illa infundebat.
{4:6} Cumque plena fuissent vasa, dixit ad filium suum: Affer mihi adhuc vas. Et ille respondit: Non habeo. Stetitque oleum.
{4:7} Venit autem illa, et indicavit homini Dei. Et ille, Vade, inquit, vende oleum, et redde creditori tuo: tu autem, et filii tui vivite de reliquo.
{4:8} Facta est autem quędam dies, et transibat Eliseus per Sunam: erat autem ibi mulier magna, quę tenuit eum ut comederet panem: cumque frequenter inde transiret, divertebat ad eam ut comederet panem.
{4:9} Quę dixit ad virum suum: Animadverto quod vir Dei sanctus est iste, qui transit per nos frequenter.
{4:10} Faciamus ergo ei cnaculum parvum, et ponamus ei in eo lectulum, et mensam, et sellam, et candelabrum, ut cum venerit ad nos, maneat ibi.
{4:11} Facta est ergo dies quędam, et veniens divertit in cnaculum, et requievit ibi.
{4:12} Dixitque ad Giezi puerum suum: Voca Sunamitidem istam. Qui cum vocasset eam, et illa stetisset coram eo,
{4:13} dixit ad puerum suum: Loquere ad eam: Ecce, sedule in omnibus ministrasti nobis, quid vis ut faciam tibi? numquid habes negotium, et vis ut loquar regi, sive principi militię? Quę respondit: In medio populi mei habito.
{4:14} Et ait: Quid ergo vult ut faciam ei? Dixitque Giezi: Ne quęras: filium enim non habet, et vir eius senex est.
{4:15} Pręcepit itaque ut vocaret eam: quę cum vocata fuisset, et stetisset ante ostium,
{4:16} dixit ad eam: In tempore isto, et in hac eadem hora, si vita comes fuerit, habebis in utero filium. At illa respondit: Noli quęso, domine mi, vir Dei, noli mentiri ancillę tuę.
{4:17} Et concepit mulier, et peperit filium in tempore, et in hora eadem, qua dixerat Eliseus.
{4:18} Crevit autem puer. Et cum esset quędam dies, et egressus isset ad patrem suum, ad messores,
{4:19} ait patri suo: Caput meum doleo, caput meum doleo. At ille dixit puero: Tolle, et duc eum ad matrem suam.
{4:20} Qui cum tulisset, et duxisset eum ad matrem suam, posuit eum illa super genua sua usque ad meridiem, et mortuus est.
{4:21} Ascendit autem, et collocavit eum super lectulum hominis Dei, et clausit ostium: et egressa,
{4:22} vocavit virum suum, et ait: Mitte mecum, obsecro, unum de pueris, et asinam, ut excurram usque ad hominem Dei, et revertar.
{4:23} Qui ait illi: Quam ob causam vadis ad eum? hodie non sunt Calendę, neque Sabbatum. Quę respondit: Vadam:
{4:24} Stravitque asinam, et pręcepit puero: Mina, et propera, ne mihi moram facias in eundo: et hoc age quod pręcipio tibi.
{4:25} Profecta est igitur, et venit ad virum Dei in montem Carmeli: cumque vidisset eam vir Dei econtra, ait ad Giezi puerum suum: Ecce Sunamitis illa.
{4:26} Vade ergo in occursum eius, et dic ei: Recte ne agitur circa te, et circa virum tuum, et circa filium tuum? Quę respondit: Recte.
{4:27} Cumque venisset ad virum Dei in montem, apprehendit pedes eius: et accessit Giezi ut amoveret eam. Et ait homo Dei: Dimitte illam: anima enim eius in amaritudine est, et Dominus celavit a me, et non indicavit mihi.
{4:28} Quę dixit illi: Numquid petivi filium a Domino meo? numquid non dixi tibi: Ne illudas me?
{4:29} Et ille ait ad Giezi: Accinge lumbos tuos, et tolle baculum meum in manu tua, et vade. Si occurrerit tibi homo, non salutes eum: et si salutaverit te quispiam, non respondeas illi: et pones baculum meum super faciem pueri.
{4:30} Porro mater pueri ait: Vivit dominus, et vivit anima tua, non dimittam te. Surrexit ergo, et secutus est eam.
{4:31} Giezi autem pręcesserat ante eos, et posuerat baculum super faciem pueri, et non erat vox, neque sensus: reversusque est in occursum eius, et nunciavit ei, dicens: Non surrexit puer.
{4:32} Ingressus est ergo Eliseus domum, et ecce puer mortuus iacebat in lectulo eius:
{4:33} ingressusque clausit ostium super se, et super puerum: et oravit ad Dominum.
{4:34} Et ascendit, et incubuit super puerum: posuitque os suum super os eius, et oculos suos super oculos eius, et manus suas super manus eius: et incurvavit se super eum, et calefacta est caro pueri.
{4:35} At ille reversus, deambulavit in domo, semel huc atque illuc: et ascendit, et incubuit super eum: et oscitavit puer septies, aperuitque oculos.
{4:36} At ille vocavit Giezi, et dixit ei: Voca Sunamitidem hanc. Quę vocata, ingressa est ad eum. Qui ait: Tolle filium tuum.
{4:37} Venit illa, et corruit ad pedes eius, et adoravit super terram: tulitque filium suum, et egressa est,
{4:38} et Eliseus reversus est in Galgala. Erat autem fames in terra, et filii prophetarum habitabant coram eo. dixitque uni de pueris suis: Pone ollam grandem, et coque pulmentum filiis prophetarum.
{4:39} Et egressus est unus in agrum ut colligeret herbas agrestes: invenitque quasi vitem silvestrem, et collegit ex ea colocynthidas agri, et implevit pallium suum, et reversus concidit in ollam pulmenti: nesciebat enim quid esset.
{4:40} Infuderunt ergo sociis, ut comederent: cumque gustassent de coctione, clamaverunt, dicentes: Mors in olla vir Dei. Et non potuerunt comedere.
{4:41} At ille, Afferte, inquit, farinam. Cumque tulissent, misit in ollam, et ait: Infunde turbę, ut comedant. Et non fuit amplius quidquam amaritudinis in olla.
{4:42} Vir autem quidam venit de Baalsalisa deferens viro Dei panes primitiarum, viginti panes hordeaceos, et frumentum novum in pera sua. At ille dixit: Da populo, ut comedat.
{4:43} Responditque ei minister eius: Quantum est hoc, ut apponam centum viris? Rursum ille ait: Da populo, ut comedat: hęc enim dicit Dominus: Comedent, et supererit.
{4:44} Posuit itaque coram eis: qui comederunt, et superfuit iuxta verbum Domini.
[II Reges 5]
{5:1} Naaman princeps militię regis Syrię, erat vir magnus apud dominum suum, et honoratus: per illum enim dedit Dominus salutem Syrię: erat autem vir fortis et dives, sed leprosus.
{5:2} Porro de Syria egressi fuerant latrunculi, et captivam duxerant de Terra Israel puellam parvulam, quę erat in obsequio uxoris Naaman,
{5:3} quę ait ad dominam suam: Utinam fuisset dominus meus ad prophetam, qui est in Samaria: profecto curasset eum a lepra, quam habet.
{5:4} Ingressus est itaque Naaman ad dominum suum, et nunciavit ei, dicens: Sic et sic locuta est puella de Terra Israel.
{5:5} Dixitque ei rex Syrię: Vade, et mittam litteras ad regem Israel. Qui cum profectus esset, et tulisset secum decem talenta argenti, et sex millia aureos, et decem mutatoria vestimentorum,
{5:6} detulit litteras ad regem Israel, in hęc verba: Cum acceperis epistolam hanc, scito quod miserim ad te Naaman servum meum, ut cures eum a lepra sua.
{5:7} Cumque legisset rex Israel litteras, scidit vestimenta sua, et ait: Numquid Deus ego sum, ut occidere possim, et vivificare, quia iste misit ad me, ut curem hominem a lepra sua? animadvertite, et videte quod occasiones quęrat adversum me.
{5:8} Quod cum audisset Eliseus vir Dei, scidisse videlicet regem Israel vestimenta sua, misit ad eum, dicens: Quare scidisti vestimenta tua? veniat ad me, et sciat esse prophetam in Israel.
{5:9} Venit ergo Naaman cum equis, et curribus, et stetit ad ostium domus Elisei:
{5:10} misitque ad eum Eliseus nuncium, dicens: Vade, et lavare septies in Iordane, et recipiet sanitatem caro tua, atque mundaberis.
{5:11} Iratus Naaman recedebat, dicens: Putabam quod egrederetur ad me, et stans invocaret nomen Domini Dei sui, et tangeret manu sua locum leprę, et curaret me.
{5:12} Numquid non meliores sunt Abana, et Pharphar fluvii Damasci omnibus aquis Israel, ut laver in eis, et munder? Cum ergo vertisset se, et abiret indignans,
{5:13} accesserunt ad eum servi sui, et locuti sunt ei: Pater, et si rem grandem dixisset tibi propheta, certe facere debueras: quanto magis quia nunc dixit tibi: Lavare, et mundaberis?
{5:14} Descendit, et lavit in Iordane septies iuxta sermonem viri Dei, et restituta est caro eius, sicut caro pueri parvuli, et mundatus est.
{5:15} Reversusque ad virum Dei cum universo comitatu suo, venit, et stetit coram eo, et ait: Vere scio quod non sit alius Deus in universa terra, nisi tantum in Israel. Obsecro itaque ut accipias benedictionem a servo tuo.
{5:16} At ille respondit: Vivit Dominus, ante quem sto, quia non accipiam. Cumque vim faceret, penitus non acquievit.
{5:17} Dixitque Naaman: Ut vis: sed, obsecro, concede mihi servo tuo ut tollam onus duorum burdonum de terra: non enim faciet ultra servus tuus holocaustum, aut victimam diis alienis, nisi domino.
{5:18} Hoc autem solum est, de quo depreceris Dominum pro servo tuo, quando ingredietur dominus meus templum Remmon, ut adoret: et illo innitente super manum meam, si adoravero in templo Remmon, adorante eo in eodem loco, ut ignoscat mihi Dominus servo tuo pro hac re.
{5:19} Qui dixit ei: Vade in pace. Abiit ergo ab eo electo terrę tempore.
{5:20} Dixitque Giezi puer viri Dei: Pepercit dominus meus Naaman Syro isti, ut non acciperet ab eo quę attulit: vivit Dominus, quia curram post eum, et accipiam ab eo aliquid.
{5:21} Et secutus est Giezi post tergum Naaman: quem cum vidisset ille currentem ad se, desiliit de curru in occursum eius, et ait: Recte ne sunt omnia?
{5:22} Et ille ait: Recte. dominus meus misit me ad te, dicens: Modo venerunt ad me duo adolescentes de monte Ephraim, ex filiis prophetarum: da eis talentum argenti, et vestes mutatorias duplices.
{5:23} Dixitque Naaman: Melius est ut accipias duo talenta. Et coegit eum, ligavitque duo talenta argenti in duobus saccis, et duplicia vestimenta, et imposuit duobus pueris suis, qui et portaverunt coram eo.
{5:24} Cumque venisset iam vesperi, tulit de manu eorum, et reposuit in domo, dimisitque viros, et abierunt.
{5:25} ipse autem ingressus, stetit coram domino suo. Et dixit Eliseus: Unde venis Giezi? Qui respondit: Non ivit servus tuus quoquam.
{5:26} At ille ait: Nonne cor meum in pręsenti erat, quando reversus est homo de curru suo in occursum tui? Nunc igitur accepisti argentum, et accepisti vestes ut emas oliveta, et vineas, et oves, et boves, et servos, et ancillas.
{5:27} Sed et lepra Naaman adhęrebit tibi, et semini tuo, usque in sempiternum. Et egressus est ab eo leprosus quasi nix.
[II Reges 6]
{6:1} Dixerunt autem filii prophetarum ad Eliseum: Ecce locus, in quo habitamus coram te, angustus est nobis.
{6:2} Eamus usque ad Iordanem, et tollant singuli de silva materias singulas, ut ędificemus nobis ibi locum ad habitandum. Qui dixit: Ite.
{6:3} Et ait unus ex illis: Veni ergo et tu cum servis tuis. Respondit: Ego veniam.
{6:4} Et abiit cum eis. Cumque venissent ad Iordanem, cędebant ligna.
{6:5} Accidit autem, ut cum unus materiam succidisset, caderet ferrum securis in aquam: exclamavitque ille, et ait: Heu heu heu domine mi, et hoc ipsum mutuo acceperam.
{6:6} Dixit autem homo Dei: Ubi cecidit? At ille monstravit ei locum. pręcidit ergo lignum, et misit illuc: natavitque ferrum,
{6:7} et ait: Tolle. Qui extendit manum, et tulit illud.
{6:8} Rex autem Syrię pugnabat contra Israel, consiliumque iniit cum servis suis, dicens: In loco illo, et illo ponamus insidias.
{6:9} Misit itaque vir Dei ad regem Israel, dicens: Cave ne transeas in locum illum: quia ibi Syri in insidiis sunt.
{6:10} Misit itaque rex Israel ad locum, quem dixerat ei vir Dei, et pręoccupavit eum, et observavit se ibi non semel neque bis.
{6:11} Conturbatumque est cor regis Syrię pro hac re: et convocatis servis suis, ait: Quare non indicatis mihi quis proditor mei sit apud regem Israel?
{6:12} Dixitque unus servorum eius: Nequaquam domine mi rex, sed Eliseus propheta, qui est in Israel, indicat regi Israel omnia verba quęcumque locutus fueris in conclavi tuo.
{6:13} Dixitque eis: Ite, et videte ubi sit: ut mittam, et capiam eum. Annunciaveruntque ei, dicentes: Ecce in Dothan.
{6:14} Misit ergo illuc equos et currus, et robur exercitus: qui cum venissent nocte, circumdederunt civitatem.
{6:15} Consurgens autem diluculo minister viri Dei, egressus, vidit exercitum in circuitu civitatis, et equos et currus: nunciavitque ei, dicens: Heu heu heu domine mi, quid faciemus?
{6:16} At ille respondit: Noli timere: plures enim nobiscum sunt, quam cum illis.
{6:17} Cumque orasset Eliseus, ait: Domine, aperi oculos huius, ut videat. Et aperuit Dominus oculos pueri, et vidit: et ecce mons plenus equorum, et curruum igneorum, in circuitu Elisei.
{6:18} Hostes vero descenderunt ad eum: porro Eliseus oravit ad Dominum, dicens: Percute, obsecro, gentem hanc cęcitate. Percussitque eos Dominus, ne viderent, iuxta verbum Elisei.
{6:19} Dixit autem ad eos Eliseus: Non est hęc via, neque ista est civitas: sequimini me, et ostendam vobis virum, quem quęritis. Duxit ergo eos in Samariam:
{6:20} cumque ingressi fuissent in Samariam, dixit Eliseus: Domine aperi oculos istorum, ut videant. Aperuitque Dominus oculos eorum, et viderunt se esse in medio Samarię.
{6:21} Dixitque rex Israel ad Eliseum, cum vidisset eos: Numquid percutiam eos, pater mi?
{6:22} At ille ait: Non percuties: neque enim cepisti eos gladio, et arcu tuo, ut percutias: sed pone panem, et aquam coram eis, ut comedant, et bibant, et vadant ad dominum suum.
{6:23} Appositaque est eis ciborum magna pręparatio, et comederunt, et biberunt, et dimisit eos, abieruntque ad dominum suum, et ultra non venerunt latrones Syrię in Terram Israel.
{6:24} Factum est autem post hęc, congregavit Benadad rex Syrię, universum exercitum suum, et ascendit, et obsidebat Samariam.
{6:25} Factaque est fames magna in Samaria: et tandiu obsessa est, donec venundaretur caput asini octoginta argenteis, et quarta pars cabi stercoris columbarum quinque argenteis.
{6:26} Cumque rex Israel transiret per murum, mulier quędam exclamavit ad eum, dicens: Salva me domine mi rex.
{6:27} Qui ait: Non te salvat Dominus: unde te possum salvare? de area, vel de torculari? Dixitque ad eam rex: Quid tibi vis? Quę respondit:
{6:28} Mulier ista dixit mihi: Da filium tuum, ut comedamus eum hodie, et filium meum comedemus cras.
{6:29} Coximus ergo filium meum, et comedimus. Dixique ei die altera: Da filium tuum, ut comedamus eum. Quę abscondit filium suum.
{6:30} Quod cum audisset rex, scidit vestimenta sua, et transibat per murum. Viditque omnis populus cilicium, quo vestitus erat ad carnem intrinsecus.
{6:31} Et ait rex: Hęc mihi faciat Deus, et hęc addat, si steterit caput Elisei filii Saphat super ipsum hodie.
{6:32} Eliseus autem sedebat in domo sua, et senes sedebant cum eo. Pręmisit itaque virum: et antequam veniret nuncius ille, dixit ad senes: Numquid scitis quod miserit filius homicidę hic, ut pręcidatur caput meum? videte ergo, cum venerit nuncius, claudite ostium, et non sinatis eum introire: ecce enim sonitus pedum domini eius post eum est.
{6:33} Adhuc illo loquente eis, apparuit nuncius, qui veniebat ad eum. Et ait: Ecce, tantum malum a Domino est: quid amplius expectabo a Domino?
[II Reges 7]
{7:1} Dixit autem Eliseus: Audite verbum Domini: Hęc dicit Dominus: In tempore hoc cras modius similę uno statere erit, et duo modii hordei statere uno, in porta Samarię.
{7:2} Respondens unus de ducibus, super cuius manum rex incumbebat, homini Dei, ait: Si Dominus fecerit etiam cataractas in cęlo, numquid poterit esse quod loqueris? Qui ait: Videbis oculis tuis, et inde non comedes.
{7:3} Quattuor ergo viri erant leprosi iuxta introitum portę: qui dixerunt ad invicem: Quid hic esse volumus donec moriamur?
{7:4} sive ingredi voluerimus civitatem, fame moriemur: sive manserimus hic, moriendum nobis est: venite ergo, et transfugiamus ad castra Syrię. si pepercerint nobis, vivemus: si autem occidere voluerint, nihilominus moriemur.
{7:5} Surrexerunt ergo vesperi, ut venirent ad castra Syrię. Cumque venissent ad principium castrorum Syrię, nullum ibidem repererunt.
{7:6} Siquidem Dominus sonitum audiri fecerat in castris Syrię, curruum, et equorum, et exercitus plurimi: dixeruntque ad invicem: Ecce mercede conduxit adversum nos rex Israel reges Hethęorum, et Ęgyptiorum, et venerunt super nos.
{7:7} Surrexerunt ergo, et fugerunt in tenebris, et dereliquerunt tentoria sua, et equos et asinos in castris, fugeruntque animas tantum suas salvare cupientes.
{7:8} Igitur cum venissent leprosi illi ad principium castrorum, ingressi sunt unum tabernaculum, et comederunt et biberunt: tuleruntque inde argentum, et aurum, et vestes, et abierunt, et absconderunt: et rursum reversi sunt ad aliud tabernaculum, et inde similiter auferentes absconderunt.
{7:9} Dixeruntque ad invicem: Non recte facimus: hęc enim dies boni nuncii est. Si tacuerimus, et noluerimus nunciare usque mane, sceleris arguemur: venite, eamus, et nunciemus in aula regis.
{7:10} Cumque venissent ad portam civitatis, narraverunt eis, dicentes: Ivimus ad castra Syrię, et nullum ibidem reperimus hominem, nisi equos, et asinos alligatos, et fixa tentoria.
{7:11} Ierunt ergo portarii, et nunciaverunt in palatio regis intrinsecus.
{7:12} Qui surrexit nocte, et ait ad servos suos: Dico vobis quid fecerint nobis Syri: sciunt quia fame laboramus, et idcirco egressi sunt de castris, et latitant in agris, dicentes: Cum egressi fuerint de civitate, capiemus eos vivos, et tunc civitatem ingredi poterimus.
{7:13} Respondit autem unus servorum eius: Tollamus quinque equos, qui remanserunt in urbe (quia ipsi tantum sunt in universa multitudine Israel, alii enim consumpti sunt) et mittentes, explorare poterimus.
{7:14} Adduxerunt ergo duos equos, misitque rex in castra Syrorum, dicens: Ite, et videte.
{7:15} Qui abierunt post eos usque ad Iordanem: ecce autem omnis via plena erat vestibus, et vasis, quę proiecerant Syri cum turbarentur: reversique nuncii indicaverunt regi.
{7:16} Et egressus populus diripuit castra Syrię: factusque est modius similę statere uno, et duo modii hordei statere uno, iuxta verbum Domini.
{7:17} Porro rex ducem illum, in cuius manu incumbebat, constituit ad portam: quem conculcavit turba in introitu portę, et mortuus est, iuxta quod locutus fuerat vir Dei, quando descenderat rex ad eum.
{7:18} Factumque est secundum sermonem viri Dei, quem dixerat regi, quando ait: Duo modii hordei statere uno erunt, et modius similę statere uno, hoc eodem tempore cras in porta Samarię:
{7:19} quando responderat dux ille viro Dei, et dixerat: Etiamsi Dominus fecerit cataractas in cęlo, numquid poterit fieri quod loqueris? Et dixit ei: Videbis oculis tuis, et inde non comedes.
{7:20} Evenit ergo ei sicut prędictum fuerat, et conculcavit eum populus in porta, et mortuus est.
[II Reges 8]
{8:1} Eliseus autem locutus est ad mulierem, cuius vivere fecerat filium, dicens: Surge, vade tu et domus tua, et peregrinare ubicumque repereris: vocavit enim Dominus famem, et veniet super terram septem annis.
{8:2} Quę surrexit, et fecit iuxta verbum hominis Dei: et vadens cum domo sua, peregrinata est in Terra Philisthiim diebus multis.
{8:3} Cumque finiti essent anni septem, reversa est mulier de Terra Philisthiim: et egressa est ut interpellaret regem pro domo sua, et pro agris suis.
{8:4} Rex autem loquebatur cum Giezi puero viri Dei, dicens: Narra mihi omnia magnalia quę fecit Eliseus.
{8:5} Cumque ille narraret regi quo modo mortuum suscitasset, apparuit mulier, cuius vivificaverat filium, clamans ad regem pro domo sua, et pro agris suis. Dixitque Giezi: Domine mi rex, hęc est mulier, et hic est filius eius, quem suscitavit Eliseus.{8:6} Et interrogavit rex mulierem: quę narravit ei. Deditque ei rex eunuchum unum, dicens: Restitue ei omnia quę sua sunt, et universos reditus agrorum a die, qua reliquit terram usque ad pręsens.
{8:7} Venit quoque Eliseus Damascum, et Benadad rex Syrię ęgrotabat: nunciaveruntque ei, dicentes: Venit vir Dei huc.
{8:8} Et ait rex ad Hazael: Tolle tecum munera, et vade in occursum viri Dei, et consule Dominum per eum, dicens: Si evadere potero de infirmitate mea hac?
{8:9} Ivit igitur Hazael in occursum eius, habens secum munera, et omnia bona Damasci, onera quadraginta camelorum. Cumque stetisset coram eo, ait: Filius tuus Benadad rex Syrię misit me ad te, dicens: Si sanari potero de infirmitate mea hac?
{8:10} Dixitque ei Eliseus: Vade, dic ei: Sanaberis: porro ostendit mihi Dominus quia morte morietur.
{8:11} Stetique cum eo, et conturbatus est usque ad suffusionem vultus: flevitque vir Dei.
{8:12} Cui Hazael ait: Quare dominus meus flet? At ille dixit: Quia scio quę facturus sis filiis Israel mala. Civitates eorum munitas igne succendes, et iuvenes eorum interficies gladio, et parvulos eorum elides, et pręgnantes divides.
{8:13} Dixitque Hazael: Quid enim sum servus tuus canis, ut faciam rem istam magnam? Et ait Eliseus: Ostendit mihi Dominus te regem Syrię fore.
{8:14} Qui cum recessisset ab Eliseo, venit ad dominum suum. Qui ait ei: Quid dixit tibi Eliseus? At ille respondit: Dixit mihi: Recipies sanitatem.
{8:15} Cumque venisset dies altera, tulit stragulum, et infudit aquam, et expandit super faciem eius: quo mortuo, regnavit Hazael pro eo.
{8:16} Anno quinto Ioram filii Achab regis Israel, et Iosaphat regis Iuda, regnavit Ioram filius Iosaphat rex Iuda.
{8:17} Triginta duorum annorum erat cum regnare cpisset, et octo annis regnavit in Ierusalem.
{8:18} Ambulavitque in viis regum Israel, sicut ambulaverat domus Achab: filia enim Achab erat uxor eius: et fecit quod malum est in conspectu Domini.
{8:19} Noluit autem Dominus disperdere Iudam, propter David servum suum, sicut promiserat ei, ut daret illi lucernam, et filiis eius cunctis diebus.
{8:20} In diebus eius recessit Edom, ne esset sub Iuda, et constituit sibi regem.
{8:21} Venitque Ioram Seira, et omnes currus cum eo: et surrexit nocte, percussitque Idumęos, qui eum circumdederant, et principes curruum, populus autem fugit in tabernacula sua.
{8:22} Recessit ergo Edom ne esset sub Iuda, usque ad diem hanc. Tunc recessit et Lobna in tempore illo.
{8:23} Reliqua autem sermonum Ioram, et universa, quę fecit, nonne hęc scripta sunt in Libro verborum dierum regum Iuda?
{8:24} Et dormivit Ioram cum patribus suis, sepultusque est cum eis in Civitate David, et regnavit Ochozias filius eius pro eo.
{8:25} Anno duodecimo Ioram filii Achab regis Israel regnavit Ochozias filius Ioram regis Iudę.
{8:26} Viginti duorum annorum erat Ochozias cum regnare cpisset, et uno anno regnavit in Ierusalem: nomen matris eius Athalia filia Amri regis Israel.
{8:27} Et ambulavit in viis domus Achab: et fecit quod malum est coram Domino, sicut domus Achab: gener enim domus Achab fuit.
{8:28} Abiit quoque cum Ioram filio Achab, ad pręliandum contra Hazael regem Syrię in Ramoth Galaad, et vulneraverunt Syri Ioram:
{8:29} qui reversus est ut curaretur, in Iezrahel: quia vulneraverant eum Syri in Ramoth pręliantem contra Hazael regem Syrię. Porro Ochozias filius Ioram rex Iuda, descendit invisere Ioram filium Achab in Iezrahel, quia ęgrotabat ibi.
[II Reges 9]
{9:1} Eliseus autem prophetes vocavit unum de filiis prophetarum, et ait illi: Accinge lumbos tuos, et tolle lenticulam olei hanc in manu tua, et vade in Ramoth Galaad.
{9:2} Cumque veneris illuc, videbis Iehu filium Iosaphat filii Namsi: et ingressus suscitabis eum de medio fratrum suorum, et introduces in interius cubiculum.
{9:3} Tenensque lenticulam olei, fundes super caput eius, et dices: Hęc dicit Dominus: Unxi te regem super Israel. Aperiesque ostium, et fugies, et non ibi subsistes.
{9:4} Abiit ergo adolescens puer prophetę in Ramoth Galaad,
{9:5} et ingressus est illuc: ecce autem principes exercitus sedebant, et ait: Verbum mihi ad te o princeps. Dixitque Iehu: Ad quem ex omnibus nobis? At ille dixit: Ad te o princeps.
{9:6} Et surrexit et ingressus est cubiculum: at ille fudit oleum super caput eius, et ait: Hęc dicit Dominus Deus Israel: Unxi te regem super populum Domini Israel,
{9:7} et percuties domum Achab domini tui, et ulciscar sanguinem servorum meorum prophetarum, et sanguinem omnium servorum Domini de manu Iezabel.
{9:8} Perdamque omnem domum Achab: et interficiam de Achab mingentem ad parietem, et clausum, et novissimum in Israel.
{9:9} Et dabo domum Achab, sicut domum Ieroboam filii Nabat, et sicut domum Baasa filii Ahia.
{9:10} Iezabel quoque comedent canes in agro Iezrahel, nec erit qui sepeliat eam. Aperuitque ostium, et fugit.
{9:11} Iehu autem egressus est ad servos domini sui: qui dixerunt ei: Recte ne sunt omnia? quid venit insanus iste ad te? Qui ait eis: Nostis hominem, et quid locutus sit.
{9:12} At ille responderunt: Falsum est, sed magis narra nobis. Qui ait eis: Hęc et hęc locutus est mihi, et ait: Hęc dicit Dominus: Unxi te regem super Israel.
{9:13} Festinaverunt itaque, et unusquisque tollens pallium suum posuerunt sub pedibus eius, in similitudinem tribunalis, et cecinerunt tuba, atque dixerunt: Regnavit Iehu.
{9:14} Coniuravit ergo Iehu filius Iosaphat filii Namsi contra Ioram: porro Ioram obsederat Ramoth Galaad, ipse, et omnis Israel contra Hazael regem Syrię:
{9:15} et reversus fuerat ut curaretur in Iezrahel propter vulnera, quia percusserant eum Syri, pręliantem contra Hazael regem Syrię: Dixitque Iehu: Si placet vobis, nemo egrediatur profugus de civitate, ne vadat, et nunciet in Iezrahel.
{9:16} Et ascendit, et profectus est in Iezrahel: Ioram enim ęgrotabat ibi, et Ochozias rex Iuda descenderat ad visitandum Ioram.
{9:17} Igitur speculator, qui stabat super turrim Iezrahel, vidit globum Iehu venientis, et ait: Video ego globum. Dixitque Ioram: Tolle currum, et mitte in occursum eorum, et dicat vadens: Recte ne sunt omnia?
{9:18} Abiit ergo, qui ascenderat currum, in occursum eius, et ait: Hęc dicit rex: Pacata ne sunt omnia? Dixitque Iehu: Quid tibi et paci? transi, et sequere me. Nunciavit quoque speculator, dicens: Venit nuncius ad eos, et non revertitur.
{9:19} Misit etiam currum equorum secundum: venitque ad eos, et ait: Hęc dicit rex: Numquid pax est? Et ait Iehu: Quid tibi et paci? transi, et sequere me.
{9:20} Nunciavit autem speculator, dicens: Venit usque ad eos, et non revertitur: est autem incessus quasi incessus Iehu filii Namsi, pręceps enim graditur.
{9:21} Et ait Ioram: Iunge currum. Iunxeruntque currum eius, et egressus est Ioram rex Israel, et Ochozias rex Iuda, singuli in curribus suis, egressique sunt in occursum Iehu, et invenerunt eum in agro Naboth Iezrahelitę.
{9:22} Cumque vidisset Ioram Iehu, dixit: Pax est Iehu? At ille respondit: Quę pax? adhuc fornicationes Iezabel matris tuę, et veneficia eius multa vigent.
{9:23} Convertit autem Ioram manum suam, et fugiens ait ad Ochoziam: Insidię Ochozia.
{9:24} Porro Iehu tetendit arcum manu, et percussit Ioram inter scapulas: et egressa est sagitta per cor eius, statimque corruit in curru suo.
{9:25} Dixitque Iehu ad Badacer ducem: Tolle, proiice eum in agro Naboth Iezrahelitę: memini enim quando ego et tu sedentes in curru sequebamur Achab patrem huius, quod Dominus onus hoc levaverit super eum, dicens:
{9:26} Si non pro sanguine Naboth, et pro sanguine filiorum eius, quem vidi heri, ait Dominus, reddam tibi in agro isto, dicit Dominus. Nunc ergo tolle, et proiice eum in agrum iuxta verbum Domini.
{9:27} Ochozias autem rex Iuda videns hoc, fugit per viam domus horti: persecutusque est eum Iehu, et ait: Etiam hunc percutite in curru suo. Et percusserunt eum in ascensu Gaver, qui est iuxta Ieblaam: qui fugit in Mageddo, et mortuus est ibi.
{9:28} Et imposuerunt eum servi eius super currum suum, et tulerunt in Ierusalem: sepelieruntque eum in sepulchro cum patribus suis in Civitate David.
{9:29} Anno undecimo Ioram filii Achab, regnavit Ochozias super Iudam,
{9:30} venitque Iehu in Iezrahel. Porro Iezabel introitu eius audito, depinxit oculos suos stibio, et ornavit caput suum, et respexit per fenestram
{9:31} ingredientem Iehu per portam, et ait: Numquid pax potest esse Zambri, qui interfecit dominum suum?
{9:32} Levavitque Iehu faciem suam ad fenestram, et ait: Quę est ista? et inclinaverunt se ad eum duo, vel tres eunuchi.
{9:33} At ille dixit eis: Pręcipitate eam deorsum. et pręcipitaverunt eam, aspersusque est sanguine paries, et equorum ungulę conculcaverunt eam.
{9:34} Cumque introgressus esset, ut comederet, biberetque, ait: Ite, et videte maledictam illam, et sepelite eam: quia filia regis est.
{9:35} Cumque issent ut sepelirent eam, non invenerunt nisi calvariam, et pedes, et summas manus.
{9:36} Reversique nunciaverunt ei. Et ait Iehu: Sermo Domini est, quem locutus est per servum suum Eliam Thesbiten, dicens: In agro Iezrahel comedent canes carnes Iezabel,
{9:37} et erunt carnes Iezabel sicut stercus super faciem terrę in agro Iezrahel, ita ut prętereuntes dicant: Hęccine est illa Iezabel?
[II Reges 10]
{10:1} Erant autem Achab septuaginta filii in Samaria: scripsit ergo Iehu litteras, et misit in Samariam, ad optimates civitatis, et ad maiores natu, et ad nutritios Achab, dicens:
{10:2} Statim ut acceperitis litteras has, qui habetis filios domini vestri, et currus, et equos, et civitates firmas, et arma,
{10:3} eligite meliorem, et eum qui vobis placuerit de filiis domini vestri, et eum ponite super solium patris sui, et pugnate pro domo domini vestri.
{10:4} Timuerunt illi vehementer, et dixerunt: Ecce duo reges non potuerunt stare coram eo, et quo modo nos valebimus resistere?
{10:5} Miserunt ergo prępositi domus, et pręfecti civitatis, et maiores natu, et nutritii, ad Iehu, dicentes: Servi tui sumus, quęcumque iusseris faciemus, nec constituemus nobis regem: quęcumque tibi placent, fac.
{10:6} Rescripsit autem eis litteras secundo, dicens: Si mei estis, et obeditis mihi, tollite capita filiorum domini vestri, et venite ad me hac eadem hora cras in Iezrahel. Porro filii regis, septuaginta viri apud optimates civitates nutriebantur.
{10:7} Cumque venissent litteras ad eos, tulerunt filios regis, et occiderunt septuaginta viros, et posuerunt capita eorum in cophinis, et miserunt ad eum in Iezrahel.
{10:8} Venit autem nuncius, et indicavit ei, dicens: Attulerunt capita filiorum regis. Qui respondit: Ponite ea ad duos acervos iuxta introitum portę usque mane.
{10:9} Cumque diluxisset, egressus est, et stans dixit ad omnem populum: Iusti estis: si ego coniuravi contra dominum meum, et interfeci eum, quis percussit omnes hos?
{10:10} Videte ergo nunc quoniam non cecidit de sermonibus Domini in terram, quos locutus est Dominus super domum Achab, et Dominus fecit quod locutus est in manu servi sui Elię.
{10:11} Percussit igitur Iehu omnes, qui reliqui erant de domo Achab in Iezrahel, et universos optimates eius, et notos, et sacerdotes, donec non remanerent ex eo reliquię.
{10:12} Et surrexit, et venit in Samariam: cumque venisset ad Cameram pastorum in via,
{10:13} invenit fratres Ochozię regis Iuda, dixitque ad eos: Quinam estis vos? Qui responderunt: Fratres Ochozię sumus, et descendimus ad salutandos filios regis, et filios reginę.
{10:14} Qui ait: Comprehendite eos vivos. Quos cum comprehendissent vivos, iugulaverunt eos in cisterna iuxta Cameram, quadraginta duos viros, et non reliquit ex eis quemquam.
{10:15} Cumque abiisset inde, invenit Ionadab filium Rechab in occursum sibi, et benedixit ei. Et ait ad eum: Numquid est cor tuum rectum, sicut cor meum cum corde tuo? Et ait Ionadab: Est. Si est, inquit, da manum tuam. Qui dedit ei manum suam. At ille levavit eum ad se in currum:
{10:16} dixitque ad eum: Veni mecum, et vide zelum meum pro Domino. Et impositum in curru suo
{10:17} duxit in Samariam. Et percussit omnes qui reliqui fuerant de Achab in Samaria usque ad unum, iuxta verbum Domini, quod locutus est per Eliam.
{10:18} Congregavit ergo Iehu omnem populum, et dixit ad eos: Achab coluit Baal parum, ego autem colam eum amplius.
{10:19} Nunc igitur omnes prophetas Baal, et universos servos eius, et cunctos sacerdotes ipsius vocate ad me: nullus sit qui non veniat, sacrificium enim grande est mihi Baal: quicumque defuerit, non vivet. Porro Iehu faciebat hoc insidiose, ut disperderet cultores Baal.
{10:20} Et dixit: Sanctificate diem sollemnem Baal. Vocavitque
{10:21} et misit in univeros terminos Israel, et venerunt cuncti servi Baal: non fuit residuus ne unus quidem qui non veniret. Et ingressi sunt templum Baal: et repleta est domus Baal, a summo usque ad summum.
{10:22} Dixitque his, qui erant super vestes: Proferte vestimenta universis servis Baal. Et protulerunt eis vestes.
{10:23} Ingressusque Iehu, et Ionadab filius Rechab templum Baal, ait cultoribus Baal: Perquirite, et videte, ne quis forte vobiscum sit de servis Domini, sed ut sint servi Baal soli.
{10:24} Ingressi sunt igitur ut facerent victimas et holocausta: Iehu autem pręparaverat sibi foris octoginta viros, et dixerat eis: Quicumque fugerit de hominibus his, quos ego adduxero in manus vestras, anima eius erit pro anima illius.
{10:25} Factum est autem, cum completum esset holocaustum, pręcepit Iehu militibus et ducibus suis: Ingredimini, et percutite eos, nullus evadat. Percusseruntque eos in ore gladii, et proiecerunt milites et duces: et ierunt in civitatem templi Baal,
{10:26} et protulerunt statuam de fano Baal, et combusserunt,
{10:27} et comminuerunt eam. Destruxerunt quoque ędem Baal, et fecerunt pro ea latrinas usque in diem hanc.
{10:28} Delevit itaque Iehu Baal de Israel:
{10:29} verumtamen a peccatis Ieroboam filii Nabat, qui peccare fecit Israel, non recessit, nec dereliquit vitulos aureos, qui erant in Bethel, et in Dan.
{10:30} Dixit autem Dominus ad Iehu: Quia studiose egisti quod rectum erat, et placebat in oculis meis, et omnia quę erant in corde meo fecisti contra domum Achab: filii tui usque ad quartam generationem sedebunt super thronum Israel.
{10:31} Porro Iehu non custodivit ut ambularet in lege Domini Dei Israel in toto corde suo: non enim recessit a peccatis Ieroboam, qui peccare fecerat Israel.
{10:32} In diebus illis cpit Dominus tędere super Israel: percussitque eos Hazael in universis finibus Israel,
{10:33} a Iordane contra Orientalem plagam, omnem Terram Galaad, et Gad, et Ruben, et Manasse, ab Aroer, quę est super Torrentem Arnon, et Galaad, et Basan.
{10:34} Reliqua autem verborum Iehu, et universa quę fecit, et fortitudo eius, nonne hęc scripta sunt in Libro verborum dierum regum Israel?
{10:35} Et dormivit Iehu cum patribus suis, sepelieruntque eum in Samaria: et regnavit Ioachaz filius eius pro eo.
{10:36} Dies autem, quos regnavit Iehu super Israel, viginti et octo anni sunt, in Samaria.
[II Reges 11]
{11:1} Athalia vero mater Ochozię, videns mortuum filium suum, surrexit, et interfecit omne semen regium.
{11:2} Tollens autem Iosaba filia regis Ioram, soror Ochozię, Ioas filium Ochozię, furata est eum de medio filiorum regis, qui interficiebantur, et nutricem eius de triclinio: et abscondit eum a facie Athalię ut non interficeretur.
{11:3} Eratque cum ea sex annis clam in domo Domini: porro Athalia regnavit super terram.
{11:4} Anno autem septimo misit Ioiada, et assumens centuriones, et milites introduxit ad se in templum Domini, pepigitque cum eis fdus: et adiurans eos in domo Domini, ostendit eis filium regis:
{11:5} et pręcepit illis, dicens: Iste est sermo, quem facere debetis:
{11:6} Tertia pars vestrum introeat sabbato, et observet excubias domus regis. Tertia autem pars sit ad portam Sur, et tertia pars sit ad portam, quę est post habitaculum scutariorum: et custodietis excubias domus Messa.
{11:7} Duę vero partes e vobis, omnes egredientes sabbato, custodiant excubias domus Domini circa regem.
{11:8} Et vallabitis eum, habentes arma in manibus vestris: si quis autem ingressus fuerit septum templi, interficiatur: eritisque cum rege introeunte et egrediente.
{11:9} Et fecerunt centuriones iuxta omnia, quę pręceperat eis Ioiada sacerdos: et assumentes singuli viros suos, qui ingrediebantur sabbatum, cum his qui egrediebantur sabbato, venerunt ad Ioiadam sacerdotem.
{11:10} Qui dedit eis hastas, et arma regis David, quę erant in domo Domini.
{11:11} Et steterunt singuli habentes arma in manu sua a parte templi dextera, usque ad partem sinistram altaris, et ędis, circum regem.
{11:12} Produxitque filium regis, et posuit super eum diadema, et testimonium: feceruntque eum regem, et unxerunt: et plaudentes manu, dixerunt: Vivat rex.
{11:13} Audivit autem Athalia vocem populi currentis: et ingressa ad turbas in templum Domini,
{11:14} vidit regem stantem super tribunal iuxta morem, et cantores, et tubas prope eum, omnemque populum terrę lętantem, et canentem tubis: et scidit vestimenta sua, clamavitque: Coniuratio, coniuratio.
{11:15} Pręcepit autem Ioiada centurionibus, qui erant super exercitum, et ait eis: Educite eam extra septa templi, et quicumque eam secutus fuerit, feriatur gladio. Dixerat enim sacerdos: Non occidatur in templo Domini.
{11:16} Imposueruntque ei manus, et impegerunt eam per viam introitus equorum, iuxta palatium, et interfecta est ibi.
{11:17} Pepigit ergo Ioiada fdus inter Dominum, et inter regem, et inter populum, ut esset populus Domini, et inter regem et populum.
{11:18} Ingressusque est omnis populus terrę templum Baal, et destruxerunt aras eius, et imagines contriverunt valide: Mathan quoque sacerdotem Baal occiderunt coram altari. Et posuit sacerdos custodias in domo Domini.
{11:19} Tulitque centuriones, et Cerethi et Phelethi legiones, et omnem populum terrę, deduxeruntque regem de domo Domini: et venerunt per viam portę scutariorum in palatium, et sedit super thronum regum.
{11:20} Lętatusque est omnis populus terrę, et civitas conquievit: Athalia autem occisa est gladio in domo regis.
{11:21} Septemque annorum erat Ioas, cum regnare cpisset.
[II Reges 12]
{12:1} Anno septimo Iehu regnavit Ioas: et quadraginta annis regnavit in Ierusalem. nomen matris eius Sebia de Bersabee.
{12:2} Fecitque Ioas rectum coram Domino cunctis diebus, quibus docuit eum Ioiada sacerdos.
{12:3} Verumtamen excelsa non abstulit: adhuc enim populus immolabat, et adolebat in excelsis incensum.
{12:4} Dixitque Ioas ad sacerdotes: Omnem pecuniam sanctorum, quę illata fuerit in templum Domini a prętereuntibus, quę offertur pro pretio animę, et quam sponte et arbitrio cordis sui inferunt in templum Domini:
{12:5} accipiant illam sacerdotes iuxta ordinem suum, et instaurent sartatecta domus, siquid necessarium viderint instauratione.
{12:6} Igitur usque ad vigesimum tertium annum regis Ioas, non instauraverunt sacerdotes sartatecta templi.
{12:7} Vocavitque rex Ioas Ioiadam pontificem et sacerdotes, dicens eis: Quare sartatecta non instauratis templi? nolite ergo amplius accipere pecuniam iuxta ordinem vestrum, sed ad instaurationem templi reddite eam.
{12:8} Prohibitique sunt sacerdotes ultra accipere pecuniam a populo, et instaurare sartatecta domus.
{12:9} Et tulit Ioiada pontifex gazophylacium unum, aperuitque foramen desuper, et posuit illud iuxta altare ad dexteram ingredientium domum Domini, mittebantque in eo sacerdotes, qui custodiebant ostia, omnem pecuniam, quę deferebatur ad templum Domini.
{12:10} Cumque viderent nimiam pecuniam esse in gazophylacio, ascendebat scriba regis, et pontifex, effundebantque et numerabant pecuniam, quę inveniebatur in domo Domini:
{12:11} et dabant eam iuxta numerum atque mensuram in manu eorum, qui pręerant cęmentariis domus Domini: qui impendebant eam in fabris lignorum, et in cęmentariis iis, qui operabantur in domo Domini,
{12:12} et sartatecta faciebant: et in iis, qui cędebant saxa, et ut emerent ligna, et lapides, qui excidebantur, ita ut impleretur instauratio domus Domini in universis, quę indigebant expensa ad muniendam domum.
{12:13} Verumtamen non fiebant ex eadem pecunia hydrię templi Domini, et fuscinulę, et thuribula, et tubę, et omne vas aureum et argenteum de pecunia, quę inferebatur in templum Domini.
{12:14} iis enim, qui faciebant opus, dabatur ut instauraretur templum Domini:
{12:15} et non fiebat ratio iis hominibus, qui accipiebant pecuniam ut distribuerent eam artificibus, sed in fide tractabant eam.
{12:16} Pecuniam vero pro delicto, et pecuniam pro peccatis non inferebant in templum Domini, quia sacerdotum erat.
{12:17} Tunc ascendit Hazael rex Syrię, et pugnabat contra Geth, cepitque eam: et direxit faciem suam ut ascenderet in Ierusalem.
{12:18} Quam ob rem tulit Ioas rex Iuda omnia sanctificata, quę consecraverant Iosaphat, et Ioram, et Ochozias patres eius reges Iuda, et quę ipse obtulerat: et universum argentum, quod inveniri potuit in thesauris templi Domini, et in palatio regis: misitque Hazaeli regi Syrię, et recessit ab Ierusalem.
{12:19} Reliqua autem sermonum Ioas, et universa quę fecit, nonne hęc scripta sunt in Libro verborum dierum regum Iuda?
{12:20} Surrexerunt autem servi eius, et coniuraverunt inter se, percusseruntque Ioas in Domo Mello in descensu Sella.
{12:21} Iosachar namque filius Semaath, et Iozabad filius Somer servi eius, percusserunt eum, et mortuus est: et sepelierunt eum cum patribus suis in Civitate David, regnavitque Amasias filius eius pro eo.
[II Reges 13]
{13:1} Anno vigesimo tertio Ioas filii Ochozię regis Iuda, regnavit Ioachaz filius Iehu super Israel in Samaria decem et septem annis.
{13:2} Et fecit malum coram Domino, secutusque est peccata Ieroboam filii Nabat, qui peccare fecit Israel, et non declinavit ab eis.
{13:3} Iratusque est furor Domini contra Israel, et tradidit eos in manu Hazael regis Syrię, et in manu Benadad filii Hazael cunctis diebus.
{13:4} Deprecatus est autem Ioachaz faciem Domini, et audivit eum Dominus: vidit enim angustiam Israel, quia attriverat eos rex Syrię:
{13:5} et dedit Dominus salvatorem Israeli, et liberatus est de manu regis Syrię: habitaveruntque filii Israel in tabernaculis suis sicut heri et nudiustertius.
{13:6} Verumtamen non recesserunt a peccatis domus Ieroboam, qui peccare fecit Israel, sed in ipsis ambulaverunt: siquidem et lucus permansit in Samaria.
{13:7} Et non sunt derelicti Ioachaz de populo nisi quinquaginta equites, et decem currus, et decem millia peditum: interfecerat enim eos rex Syrię, et redegerat quasi pulverem in tritura areę.
{13:8} Reliqua autem sermonum Ioachaz, et universa quę fecit, et fortitudo eius, nonne hęc scripta sunt in Libro sermonum dierum regum Israel?
{13:9} Dormivitque Ioachaz cum patribus suis, et sepelierunt eum in Samaria: regnavitque Ioas filius eius pro eo.
{13:10} Anno trigesimo septimo Ioas regis Iuda regnavit Ioas filius Ioachaz super Israel in Samaria sedecim annis,
{13:11} et fecit quod malum est in conspectu Domini: non declinavit ab omnibus peccatis Ieroboam filii Nabat, qui peccare fecit Israel, sed in ipsis ambulavit.
{13:12} Reliqua autem sermonum Ioas, et universa quę fecit, et fortitudo eius, quo modo pugnaverit contra Amasiam regem Iuda, nonne hęc scripta sunt in Libro sermonum dierum regum Israel?
{13:13} Et dormivit Ioas cum patribus suis: Ieroboam autem sedit super solium eius. Porro Ioas sepultus est in Samaria cum regibus Israel.
{13:14} Eliseus autem ęgrotabat infirmitate, qua et mortuus est: descenditque ad eum Ioas rex Israel, et flebat coram eo, dicebatque: Pater mi, pater mi, currus Israel et auriga eius.
{13:15} Et ait illi Eliseus: Affer arcum, et sagittas. Cumque attulisset ad eum arcum, et sagittas,
{13:16} dixit ad regem Israel: Pone manum tuam super arcum. Et cum posuisset ille manum suam, superposuit Eliseus manus suas manibus regis,
{13:17} et ait: Aperi fenestram orientalem. Cumque aperuisset, dixit Eliseus: Iace sagittam. Et iecit. Et ait Eliseus: Sagitta salutis Domini, et sagitta salutis contra Syriam: percutiesque Syriam in Aphec, donec consumas eam.
{13:18} Et ait: Tolle sagittas. Qui cum tulisset, rursum dixit ei: Percute iaculo terram. Et cum percussisset tribus vicibus, et stetisset,
{13:19} iratus est vir Dei contra eum, et ait: Si percussisses quinquies, aut sexies, sive septies, percussisses Syriam usque ad consumptionem: nunc autem tribus vicibus percuties eam.
{13:20} Mortuus est ergo Eliseus, et sepelierunt eum. Latrunculi autem de Moab venerunt in terram in ipso anno.
{13:21} Quidam autem sepelientes hominem, viderunt latrunculos, et proiecerunt cadaver in sepulchro Elisei. Quod cum tetigisset ossa Elisei, revixit homo, et stetit super pedes suos.
{13:22} Igitur Hazael rex Syrię afflixit Israel cunctis diebus Ioachaz:
{13:23} et misertus est Dominus eorum, et reversus est ad eos propter pactum suum, quod habebat cum Abraham, et Isaac, et Iacob: et noluit disperdere eos, neque proiicere penitus usque in pręsens tempus.
{13:24} Mortuus est autem Hazael rex Syrię, et regnavit Benadad filius eius pro eo.
{13:25} Porro Ioas filius Ioachaz tulit urbes de manu Benadad filii Hazael, quas tulerat de manu Ioachaz patris sui iure pręlii, tribus vicibus percussit eum Ioas, et reddidit civitates Israel.
[II Reges 14]
{14:1} In anno secundo Ioas filii Ioachaz regis Israel regnavit Amasias filius Ioas regis Iuda.
{14:2} Viginti quinque annorum erat cum regnare cpisset: viginti autem et novem annis regnavit in Ierusalem, nomen matris eius Ioadan de Ierusalem.
{14:3} Et fecit rectum coram Domino, verumtamen non ut David pater eius. Iuxta omnia, quę fecit Ioas pater suus, fecit:
{14:4} nisi hoc tantum quod excelsa non abstulit: adhuc enim populus immolabat, et adolebat incensum in excelsis.
{14:5} Cumque obtinuisset regnum, percussit servos suos, qui interfecerant regem patrem suum:
{14:6} filios autem eorum, qui occiderant, non occidit, iuxta quod scriptum est in libro legis Moysi, sicut pręcepit Dominus, dicens: Non morientur patres pro filiis, neque filii morientur pro patribus: sed unusquisque in peccato suo morietur.
{14:7} Ipse percussit Edom in Valle Salinarum decem millia, et apprehendit petram in pręlio, vocavitque nomen eius Iectehel usque in pręsentem diem.
{14:8} Tunc misit Amasias nuncios ad Ioas filium Ioachaz, filii Iehu regis Israel, dicens: Veni, et videamus nos.
{14:9} Remisitque Ioas rex Israel ad Amasiam regem Iuda, dicens: Carduus Libani misit ad cedrum, quę est in Libano, dicens: Da filiam tuam filio meo uxorem. Transieruntque bestię saltus, quę sunt in Libano, et conculcaverunt carduum.
{14:10} Percutiens invaluisti super Edom, et sublevavit te cor tuum: contentus esto gloria, et sede in domo tua: quare provocas malum, ut cadas tu et Iudas tecum?
{14:11} Et non acquievit Amasias: Ascenditque Ioas rex Israel, et viderunt se, ipse et Amasias rex Iuda in Bethsames oppido Iudę.
{14:12} Percussusque est Iuda coram Israel, et fugerunt unusquisque in tabernacula sua.
{14:13} Amasiam vero regem Iuda filium Ioas filii Ochozię cepit Ioas rex Israel in Bethsames, et adduxit eum in Ierusalem: et interrupit murum Ierusalem, a porta Ephraim usque ad portam anguli, quadringentis cubitis.
{14:14} Tulitque omne aurum, et argentum, et universa vasa, quę inventa sunt in domo Domini, et in thesauris regis, et obsides, et reversus est in Samariam.
{14:15} Reliqua autem verborum Ioas quę fecit, et fortitudo eius qua pugnavit contra Amasiam regem Iuda, nonne hęc scripta sunt in Libro sermonum dierum regum Israel?
{14:16} Dormivitque Ioas cum patribus suis, et sepultus est in Samaria cum regibus Israel: et regnavit Ieroboam filius eius pro eo.
{14:17} Vixit autem Amasias, filius Ioas, rex Iuda, postquam mortuus est Ioas filius Ioachaz regis Israel quindecim annis.
{14:18} Reliqua autem sermonum Amasię, nonne hęc scripta sunt in Libro sermonum dierum regum Iuda?
{14:19} Factaque est contra eum coniuratio in Ierusalem: at ille fugit in Lachis. Miseruntque post eum in Lachis, et interfecerunt eum ibi.
{14:20} Et asportaverunt in equis, sepultusque est in Ierusalem cum patribus suis in Civitate David.
{14:21} Tulit autem universus populus Iudę Azariam annos natum sedecim, et constituerunt eum regem pro patre eius Amasia.
{14:22} Ipse ędificavit Ęlath, et restituit eam Iudę, postquam dormivit rex cum patribus suis.
{14:23} Anno quintodecimo Amasię filii Ioas regis Iuda, regnavit Ieroboam filius Ioas regis Israel in Samaria, quadraginta et uno anno:
{14:24} et fecit quod malum est coram Domino. Non recessit ab omnibus peccatis Ieroboam filii Nabat, qui peccare fecit Israel.
{14:25} Ipse restituit terminos Israel ab introitu Emath, usque ad Mare solitudinis, iuxta sermonem Domini Dei Israel, quem locutus est per servum suum Ionam filium Amathi prophetam, qui erat de Geth, quę est in Opher.
{14:26} Vidit enim Dominus afflictionem Israel amaram nimis, et quod consumpti essent usque ad clausos carcere, et extremos, et non esset qui auxiliaretur Israeli.
{14:27} Nec locutus est Dominus ut deleret nomen Israel de sub cęlo, sed salvavit eos in manu Ieroboam filii Ioas.
{14:28} Reliqua autem sermonum Ieroboam, et universa quę fecit, et fortitudo eius, qua pręliatus est, et quomodo restituit Damascum, et Emath Iudę in Israel, nonne hęc scripta sunt in Libro sermonum dierum regum Israel?
{14:29} Dormivitque Ieroboam cum patribus suis regibus Israel, et regnavit Zacharias filius eius pro eo.
[II Reges 15]
{15:1} Anno vigesimo septimo Ieroboam regis Israel regnavit Azarias filius Amasię regis Iuda.
{15:2} Sedecim annorum erat cum regnare cpisset, et quinquaginta duobus annis regnavit in Ierusalem: nomen matris eius Iechelia de Ierusalem.
{15:3} Fecitque quod erat placitum coram Domino, iuxta omnia quę fecit Amasias pater eius.
{15:4} Verumtamen excelsa non est demolitus: adhuc populus sacrificabat, et adolebat incensum in excelsis.
{15:5} Percussit autem Dominus regem, et fuit leprosus usque in diem mortis suę, et habitabat in domo libera seorsum: Ioatham vero filius regis gubernabat palatium, et iudicabit populum terrę.
{15:6} Reliqua autem sermonum Azarię, et universa quę fecit, nonne hęc scripta sunt in Libro verborum dierum regum Iuda?
{15:7} Et dormivit Azarias cum patribus suis: sepelieruntque eum cum maioribus suis in civitate David, et regnavit Ioatham filius eius pro eo.
{15:8} Anno trigesimo octavo Azarię regis Iuda, regnavit Zacharias filius Ieroboam super Israel in Samaria sex mensibus:
{15:9} et fecit quod malum est coram Domino, sicut fecerant patres eius: non recessit a peccatis Ieroboam filii Nabat, qui peccare fecit Israel.
{15:10} Coniuravit autem contra eum Sellum filius Iabes: percussitque eum palam, et interfecit, regnavitque pro eo.
{15:11} Reliqua autem verborum Zacharię, nonne hęc scripta sunt in Libro sermonum dierum regum Israel?
{15:12} Iste est sermo Domini, quem locutus est ad Iehu, dicens: Filii tui usque ad quartam generationem sedebunt super thronum Israel. Factumque est ita.
{15:13} Sellum filius Iabes regnavit trigesimo novo anno Azarię regis Iuda: regnavit autem uno mense in Samaria.
{15:14} Et ascendit Manahem filius Gadi de Thersa: venitque in Samariam, et percussit Sellum filium Iabes in Samaria, et interfecit eum, regnavitque pro eo.
{15:15} Reliqua autem verborum Sellum, et coniuratio eius, per quam tetendit insidias, nonne hęc scripta sunt in Libro sermonum dierum regum Israel?
{15:16} Tunc percussit Manahem Thapsam, et omnes qui erant in ea, et terminos eius de Thersa. noluerant enim aperire ei: et interfecit omnes pręgnantes eius, et scidit eas.
{15:17} Anno trigesimo nono Azarię regis Iuda regnavit Manahem filius Gadi super Israel decem annis in Samaria.
{15:18} Fecitque quod erat malum coram Domino: non recessit a peccatis Ieroboam filii Nabat, qui peccare fecit Israel cunctis diebus eius.
{15:19} Veniebat Phul rex Assyriorum in terram, et dabat Manahem Phul mille talenta argenti, ut esset ei in auxilium, et firmaret regnum eius.
{15:20} Indixitque Manahem argentum super Israel cunctis potentibus et divitibus, ut daret regi Assyriorum quinquaginta siclos argenti per singulos: reversusque est rex Assyriorum, et non est moratus in terra.
{15:21} Reliqua autem sermonum Manahem, et universa quę fecit, nonne hęc scripta sunt in Libro sermonum dierum regum Israel?
{15:22} Et dormivit Manahem cum patribus suis: regnavitque Phaceia filius eius pro eo.
{15:23} Anno quinquagesimo Azarię regis Iuda, regnavit Phaceia filius Manahem super Israel in Samaria biennio:
{15:24} et fecit quod erat malum coram Domino: non recessit a peccatis Ieroboam filii Nabat, qui peccare fecit Israel.
{15:25} Coniuravit autem adversus eum Phacee filius Romelię, dux eius, et percussit eum in Samaria in turre domus regię iuxta Argob, et iuxta Arie, et cum eo quinquaginta viros de filiis Galaaditarum, et interfecit eum, regnavitque pro eo.
{15:26} Reliqua autem sermonum Phaceia, et universa quę fecit, nonne hęc scripta sunt in Libro sermonum dierum regum Israel?
{15:27} Anno quinquagesimo secundo Azarię regis Iuda regnavit Phacee filius Romelię super Israel in Samaria viginti annis.
{15:28} Et fecit quod erat malum coram Domino: non recessit a peccatis Ieroboam filii Nabat, qui peccare fecit Israel.
{15:29} In diebus Phacee regis Israel venit Theglathphalasar rex Assur, et cepit Aion, et Abel Domum, Maacha et Ianoe, et Cedes, et Asor, et Galaad, et Galilęam, et universam Terram Nephthali: et transtulit eos in Assyrios.
{15:30} Coniuravit autem, et tetendit insidias Osee filius Ela contra Phacee filium Romelię, et percussit eum, et interfecit: regnavitque pro eo vigesimo anno Ioatham filii Ozię.
{15:31} Reliqua autem sermonum Phacee, et universa quę fecit, nonne hęc scripta sunt in Libro sermonum dierum regum Israel?
{15:32} Anno secundo Phacee, filii Romelię regis Israel, regnavit Ioatham filius Ozię regis Iuda.
{15:33} Viginti quinque annorum erat cum regnare cpisset, et sedecim annis regnavit in Ierusalem: nomen matris eius Ierusa, filia Sadoc.
{15:34} Fecitque quod erat placitum coram Domino: iuxta omnia, quę fecerat Ozias pater suus, operatus est.
{15:35} Verumtamen excelsa non abstulit: adhuc populus immolabat, et adolebat incensum in excelsis: ipse ędificavit portam domus Domini sublimissimam.
{15:36} Reliqua autem sermonum Ioatham, et universa quę fecit, nonne hęc scripta sunt in Libro verborum dierum regum Iuda?
{15:37} In diebus illis cpit Dominus mittere in Iudam Rasin regem Syrię, et Phacee filium Romelię.
{15:38} Et dormivit Ioatham cum patribus suis, sepultusque est cum eis in Civitate David patris sui, et regnavit Achaz filius eius pro eo.
[II Reges 16]
{16:1} Anno decimo septimo Phacee filii Romelię regnavit Achaz filius Ioatham regis Iuda.
{16:2} Viginti annorum erat Achaz cum regnare cpisset, et sedecim annis regnavit in Ierusalem: non fecit quod erat placitum in conspectu Domini Dei sui, sicut David pater eius.
{16:3} sed ambulavit in via regum Israel: insuper et filium suum consecravit, transferens per ignem secundum idola Gentium, quę dissipavit Dominus coram filiis Israel.
{16:4} Immolabat quoque victimas, et adolebat incensum in excelsis, et in collibus, et sub omni ligno frondoso.
{16:5} Tunc ascendit Rasin rex Syrię, et Phacee filius Romelię rex Israel in Ierusalem ad pręliandum: cumque obsiderent Achaz, non valuerunt superare eum.
{16:6} In tempore illo restituit Rasin rex Syrię, Ailam Syrię, et eiecit Iudęos de Aila: et Idumęi venerunt in Ailam, et habitaverunt ibi usque in diem hanc.
{16:7} Misit autem Achaz nuncios ad Theglathphalasar regem Assyriorum, dicens: Servus tuus, et filius tuus ego sum: ascende, et salvum me fac de manu regis Syrię, et de manu regis Israel, qui consurrexerunt adversum me.
{16:8} Et cum collegisset argentum et aurum, quod inveniri potuit in domo Domini, et in thesauris regis, misit regi Assyriorum munera.
{16:9} Qui et acquievit voluntati eius: ascendit enim rex Assyriorum in Damascum, et vastavit eam: et transtulit habitatores eius Cyrenen, Rasin autem interfecit.
{16:10} Perrexitque rex Achaz in occursum Theglathphalasar regis Assyriorum in Damascum. cumque vidisset altare Damasci, misit rex Achaz ad Uriam sacerdotem exemplar eius, et similitudinem iuxta omne opus eius.
{16:11} Extruxitque Urias sacerdos altare iuxta omnia, quę pręceperat rex Achaz, de Damasco, ita fecit sacerdos Urias, donec veniret rex Achaz de Damasco.
{16:12} Cumque venisset rex de Damasco, vidit altare, et veneratus est illud: ascenditque et immolavit holocausta, et sacrificium suum,
{16:13} et libavit libamina, et fudit sanguinem pacificorum, quę obtulerat super altare.
{16:14} Porro altare ęreum, quod erat coram Domino, transtulit de facie templi, et de loco altaris, et de loco templi Domini: posuitque illud ex latere altaris ad Aquilonem.
{16:15} Pręcepit quoque rex Achaz Urię sacerdoti, dicens: Super altare maius offer holocaustum matutinum, et sacrificium vespertinum, et holocaustum regis, et sacrificium eius, et holocaustum universi populi terrę, et sacrificia eorum, et libamina eorum: et omnem sanguinem holocausti, et universum sanguinem victimę super illud effundes: altare vero ęreum erit paratum ad voluntatem meam.
{16:16} Fecit igitur Urias sacerdos iuxta omnia, quę pręceperat rex Achaz.
{16:17} Tulit autem rex Achaz cęlatas bases, et luterem, qui erat desuper: et mare deposuit de bobus ęreis, qui sustentabant illud, et posuit super pavimentum stratum lapide.
{16:18} Musach quoque sabbati, quod ędificaverat in templo: et ingressum regis exterius convertit in templum Domini propter regem Assyriorum.
{16:19} Reliqua autem verborum Achaz, quę fecit, nonne hęc scripta sunt in Libro sermonum dierum regum Iuda?
{16:20} Dormivitque Achaz cum patribus suis, et sepultus est cum eis in Civitate David, et regnavit Ezechias filius eius pro eo.
[II Reges 17]
{17:1} Anno duodecimo Achaz regis Iuda, regnavit Osee filius Ela in Samaria super Israel novem annis.
{17:2} Fecitque malum coram Domino: sed non sicut reges Israel, qui ante eum fuerant.
{17:3} Contra hunc ascendit Salmanasar rex Assyriorum, et factus est ei Osee servus, reddebatque illi tributa.
{17:4} Cumque deprehendisset rex Assyriorum Osee, quod rebellare nitens misisset nuncios ad Sua regem Ęgypti, ne pręstaret tributa regi Assyriorum sicut singulis annis solitus erat, obsedit eum, et vinctum misit in carcerem.
{17:5} Pervagatusque est omnem terram: et ascendens Samariam, obsedit eam tribus annis.
{17:6} Anno autem nono Osee, cepit rex Assyriorum Samariam, et transtulit Israel in Assyrios: posuique eos in Hala, et in Habor iuxta fluvium Gozan, in civitatibus Medorum.
{17:7} Factum est enim, cum peccassent filii Israel Domino Deo suo, qui eduxerat eos de Terra Ęgypti, de manu Pharaonis regis Ęgypti, coluerunt deos alienos.
{17:8} Et ambulaverunt iuxta ritum Gentium, quas consumpserat Dominus in conspectu filiorum Israel, et regum Israel: quia similiter fecerant.
{17:9} Et offenderunt filii Israel verbis non rectis Dominum Deum suum: et ędificaverunt sibi excelsa in cunctis urbibus suis a Turre custodum usque ad Civitatem munitam.
{17:10} Feceruntque sibi statuas, et lucos in omni colle sublimi, et subter omne lignum nemorosum:
{17:11} et adolebant ibi incensum super aras in morem Gentium, quas transtulerat Dominus a facie eorum: feceruntque verba pessima irritantes Dominum.
{17:12} et coluerunt immunditias, de quibus pręcepit eis Dominus ne facerent verbum hoc.
{17:13} Et testificatus est Dominus in Israel et in Iuda per manum omnium Prophetarum et Videntium, dicens: Revertimini a viis vestris pessimis, et custodite pręcepta mea, et ceremonias iuxta omnem legem, quam pręcepi patribus vestris: et sicut misi ad vos in manu servorum meorum Prophetarum.
{17:14} Qui non audierunt, sed induraverunt cervicem suam iuxta cervicem patrum suorum, qui noluerunt obedire Domino Deo suo.
{17:15} Et abiecerunt legitima eius, et pactum, quod pepigit cum patribus eorum, et testificationes, quibus contestatus est eos: secutique sunt vanitates, et vane egerunt: et secuti sunt Gentes, quę erant per circuitum eorum, super quibus pręceperat Dominus eis ut non facerent sicut et illę faciebant.
{17:16} Et dereliquerunt omnia pręcepta Domini Dei sui: feceruntque sibi conflatiles duos vitulos, et lucos, et adoraverunt universam militiam cęli: servieruntque Baal,
{17:17} et consecraverunt filios suos, et filias suas per ignem: et divinationibus inserviebant, et auguriis: et tradiderunt se ut facerent malum coram Domino, ut irritarent eum.
{17:18} Iratusque est Dominus vehementer Israeli, et abstulit eos a conspectu suo, et non remansit nisi tribus Iuda tantummodo.
{17:19} Sed nec ipse Iuda custodivit mandata Domini Dei sui: verum ambulavit in erroribus Israel, quos operatus fuerat.
{17:20} Proiecitque Dominus omne semen Israel, et afflixit eos, et tradidit eos in manu diripientium, donec proiiceret eos a facie sua:
{17:21} ex eo iam tempore, quo scissus est Israel a domo David, et constituerunt sibi regem Ieroboam filium Nabat: separavit enim Ieroboam Israel a Domino, et peccare eos fecit peccatum magnum.
{17:22} Et ambulaverunt filii Israel in universis peccatis Ieroboam quę fecerat: et non recesserunt ab eis,
{17:23} usque quo Dominus auferret Israel a facie sua, sicut locutus fuerat in manu omnium servorum suorum Prophetarum: translatusque est Israel de terra sua in Assyrios, usque in diem hanc.
{17:24} Adduxit autem rex Assyriorum de Babylone, et de Cutha, et de Avah, et de Emath, et de Sepharvaim: et collocavit eos in civitatibus Samarię pro filiis Israel: qui possederunt Samariam, et habitaverunt in urbibus eius.
{17:25} Cumque ibi habitare cpissent, non timebant Dominum: et immisit in eos Dominus leones, qui interficiebant eos.
{17:26} Nunciatumque est regi Assyriorum, et dictum: Gentes, quas transtulisti, et habitare fecisti in civitatibus Samrię, ignorant legitima Dei terrę: et immisit in eos Dominus leones, et ecce interficiunt eos, eo quod ignorent ritum Dei terrę.
{17:27} Pręcepit autem rex Assyriorum, dicens: Ducite illuc unum de sacerdotibus, quos inde captivos adduxistis, et vadat, et habitet cum eis: et doceat eos legitima Dei terrę.
{17:28} Igitur cum venisset unus de sacerdotibus his, qui captivi ducti fuerant de Samaria, habitavit in Bethel, et docebat eos quomodo colerent Dominum.
{17:29} Et unaquęque Gens fabricata est deum suum: posueruntque eos in fanis excelsis, quę fecerant Samaritę, Gens et Gens in urbibus suis, in quibus habitabat.
{17:30} Viri enim Babylonii fecerunt Sochothbenoth: viri autem Cuthęi fecerunt Nergel: et viri de Emath fecerunt Asima.
{17:31} Porro Hevęi fecerunt Nebahaz et Tharthac. Hi autem, qui erant de Sepharvaim, comburebant filios suos igni, Adramelech et Anamelech diis Sepharvaim,
{17:32} et nihilominus colebant Dominum. Fecerunt autem sibi de novissimis sacerdotes excelsorum, et ponebant eos in fanis sublimibus.
{17:33} Et cum Dominum colerent, diis quoque suis serviebant iuxta consuetudinem Gentium, de quibus translati fuerant Samariam:
{17:34} usque in pręsentem diem morem sequuntur antiquum: non timent Dominum, neque custodiunt ceremonias eius, iudicia, et legem, et mandatum, quod pręceperat Dominus filiis Iacob, quem cognominavit Israel:
{17:35} et percusserat cum eis pactum, et mandaverat eis, dicens: Nolite timere deos alienos, et non adoretis eos, neque colatis eos, et non immoletis eis:
{17:36} Sed Dominum Deum vestrum, qui eduxit vos de Terra Ęgypti in fortitudine magna, et in brachio extento, ipsum timete, et illum adorate, et ipsi immolate.
{17:37} Ceremonias quoque, et iudicia, et legem, et mandatum, quod scripsit vobis, custodite ut faciatis cunctis diebus: et non timeatis deos alienos.
{17:38} Et pactum, quod percussit vobiscum, nolite oblivisci: nec colatis deos alienos,
{17:39} sed Dominum Deum vestrum timete, et ipse eruet vos de manu omnium inimicorum vestrorum.
{17:40} Illi vero non audierunt, sed iuxta consuetudinem suam pristinam perpetrabant.
{17:41} Fuerunt igitur Gentes istę timentes quidem Dominum, sed nihilominus et idolis suis servientes: nam et filii eorum, et nepotes, sicut fecerunt patres sui, ita faciunt usque in pręsentem diem.
[II Reges 18]
{18:1} Anno tertio Osee filii Ela regis Israel, regnavit Ezechias filius Achaz regis Iuda.
{18:2} Vigintiquinque annorum erat, cum regnare cpisset: et vigintinovem annis regnavit in Ierusalem: nomen matris eius Abi filia Zacharię.
{18:3} Fecitque quod erat bonum coram Domino, iuxta omnia quę fecerat David pater eius.
{18:4} Ipse dissipavit excelsa, et contrivit statuas, et succidit lucos, confregitque serpentem ęneum, quem fecerat Moyses: siquidem usque ad illud tempus filii Israel adolebant ei incensum: vocavitque nomen eius Nohestan.
{18:5} In Domino Deo Israel speravit: itaque post eum non fuit similis ei de cunctis regibus Iuda, sed neque in his, qui ante eum fuerunt:
{18:6} et adhęsit Domino, et non recessit a vestigiis eius, fecitque mandata eius, quę pręceperat Dominus Moysi.
{18:7} Unde et erat Dominus cum eo, et in cunctis, ad quę procedebat, sapienter se agebat. Rebellavit quoque contra regem Assyriorum, et non servivit ei.
{18:8} Ipse percussit Philisthęos usque ad Gazam, et omnes terminos eorum, a Turre custodum usque ad Civitatem munitam.
{18:9} Anno quarto regis Ezechię, qui erat annus septimus Osee filii Ela regis Israel, ascendit Salmanasar rex Assyriorum in Samariam, et oppugnavit eam,
{18:10} et cepit. Nam post annos tres, anno sexto Ezechię, id est nono anno Osee regis Israel, capta est Samaria:
{18:11} et transtulit rex Assyriorum Israel in Assyrios, collocavitque eos in Hala, et in Habor fluviis Gozan in civitatibus Medorum:
{18:12} quia non audierunt vocem Domini Dei sui, sed prętergressi sunt pactum eius: omnia, quę pręceperat Moyses servus Domini, non audierunt, neque fecerunt.
{18:13} Anno quartodecimo regis Ezechię, ascendit Sennacherib rex Assyriorum ad universas civitates Iuda munitas: et cepit eas.
{18:14} Tunc misit Ezechias rex Iuda nuncios ad regem Assyriorum in Lachis, dicens: Peccavi, recede a me: et omne, quod imposueris mihi, feram. Indixit itaque rex Assyriorum Ezechię regi Iudę trecenta talenta argenti, et triginta talenta auri.
{18:15} Deditque Ezechias omne argentum quod repertum fuerat in domo Domini, et in thesauris regis.
{18:16} In tempore illo confregit Ezechias valvas templi Domini, et laminas auri, quas ipse affixerat, et dedit eas regi Assyriorum.
{18:17} Misit autem rex Assyriorum Tharthan, et Rabsaris, et Rabsacen de Lachis ad regem Ezechiam cum manu valida Ierusalem: qui cum ascendissent, venerunt Ierusalem, et steterunt iuxta aquęductum piscinę superioris, quę est in via Agrifullonis.
{18:18} Vocaveruntque regem: egressus est autem ad eos Eliacim filius Helcię prępositus domus, et Sobna scriba, et Ioahe filius Asaph a commentariis.
{18:19} Dixitque ad eos Rabsaces: Loquimini Ezechię: Hęc dicit rex magnus, rex Assyriorum: Quę est ista fiducia, qua niteris?
{18:20} Forsitan inisti consilium, ut prępares te ad pręlium. In quo confidis, ut audeas rebellare?
{18:21} an speras in baculo arundineo atque confracto Ęgypto, super quem, si incubuerit homo, comminutus ingredietur manum eius, et perforabit eam? sic est Pharao rex Ęgypti omnibus, qui confidunt in se.
{18:22} Quod si dixeritis mihi: In Domino Deo nostro habemus fiduciam: nonne iste est, cuius abstulit Ezechias excelsa et altaria: et pręcepit Iudę et Ierusalem: Ante altare hoc adorabitis in Ierusalem?
{18:23} Nunc igitur transite ad dominum meum regem Assyriorum, et dabo vobis duo millia equorum, et videte an habere valeatis ascensores eorum.
{18:24} Et quo modo potestis resistere ante unum satrapam de servis domini mei minimis? An fiduciam habes in Ęgypto propter currus et equites?
{18:25} Numquid sine Domini voluntate ascendi ad locum istum, ut demolirer eum? Dominus dixit mihi: Ascende ad terram hanc, et demolire eam.
{18:26} Dixerunt autem Eliacim filius Helcię, et Sobna, et Ioahe Rabsaci: Precamur ut loquaris nobis servis tuis Syriace: siquidem intelligimus hanc linguam: et non loquaris nobis Iudaice, audiente populo, qui est super murum.
{18:27} Responditque eis Rabsaces, dicens: Numquid ad dominum tuum, et ad te misit me dominus meus, ut loquerer sermones hos, et non potius ad viros, qui sedent super murum, ut comedant stercora sua, et bibant urinam suam vobiscum?
{18:28} Stetit itaque Rabsaces, et exclamavit voce magna Iudaice, et ait: Audite verba regis magni, regis Assyriorum.
{18:29} Hęc dicit rex: Non vos seducat Ezechias: non enim poterit eruere vos de manu mea.
{18:30} Neque fiduciam vobis tribuat super Dominum, dicens: Eruens liberabit nos Dominus, et non tradetur civitas hęc in manu regis Assyriorum.
{18:31} Nolite audire Ezechiam. Hęc enim dicit rex Assyriorum: Facite mecum quod vobis est utile, et egredimini ad me: et comedet unusquisque de vinea sua, et de ficu sua: et bibetis aquas de cisternis vestris,
{18:32} donec veniam, et transferam vos in terram, quę similis est terrę vestrę, in terram fructiferam, et fertilem vini, terram panis et vinearum, terram olivarum, et olei ac mellis, et vivetis, et non moriemini. Nolite audire Ezechiam, qui vos decipit, dicens: Dominus liberabit nos.
{18:33} Numquid liberaverunt dii Gentium terram suam de manu regis Assyriorum?
{18:34} Ubi est Deus Emath, et Arphad? ubi est Deus Sepharvaim, Ana, et Ava? numquid liberaverunt Samariam de manu mea?
{18:35} Quinam illi sunt in universis diis terrarum, qui eruerunt regionem suam de manu mea ut possit eruere Dominus Ierusalem de manu mea?
{18:36} Tacuit itaque populus, et non respondit ei quidquam: siquidem pręceptum regis acceperant ut non responderent ei.
{18:37} Venitque Eliacim filius Helcię, prępositus domus, et Sobna scriba, et Ioahe filius Asaph a commentariis ad Ezechiam scissis vestibus, et nunciaverunt ei verba Rabsacis.
[II Reges 19]
{19:1} Quę cum audisset Ezechias rex, scidit vestimenta sua, et opertus est sacco, ingressusque est domum Domini.
{19:2} Et misit Eliacim prępositum domus, et Sobnam scribam, et senes de sacerdotibus opertos saccis, ad Isaiam prophetam filium Amos.
{19:3} Qui dixerunt: Hęc dicit Ezechias: Dies tribulationis, et increpationis, et blasphemię dies iste: venerunt filii usque ad partum, et vires non habet parturiens.
{19:4} Si forte audiat Dominus Deus tuus universa verba Rabsacis, quem misit rex Assyriorum dominus suus, ut exprobraret Deum viventem, et argueret verbis, quę audivit Dominus Deus tuus: et fac orationem pro reliquiis, quę repertę sunt.
{19:5} Venerunt ergo servi regis Ezechię ad Isaiam.
{19:6} Dixitque eis Isaias: Hęc dicetis domino vestro: Hęc dicit Dominus: Noli timere a facie sermonum, quos audisti, quibus blasphemaverunt pueri regis Assyriorum me.
{19:7} Ecce, ego immittam ei spiritum, et audiet nuncium, et revertetur in terram suam, et deiiciam eum gladio in terra sua.
{19:8} Reversus est ergo Rabsaces, et invenit regem Assyriorum expugnantem Lobnam: Audierat enim quod recessisset de Lachis.
{19:9} Cumque audisset de Tharaca rege Ęthiopię, dicentes: Ecce, egressus est ut pugnet adversum te: et iret contra eum, misit nuncios ad Ezechiam dicens:
{19:10} Hęc dicite Ezechię regi Iuda: Non te seducat Deus tuus, in quo habes fiduciam: neque dicas: Non tradetur Ierusalem in manus regis Assyriorum.
{19:11} Tu enim ipse audisti quę fecerunt reges Assyriorum universis terris, quo modo vastaverunt eas: num ergo solus poteris liberari?
{19:12} Numquid liberaverunt dii Gentium singulos, quos vastaverunt patres mei, Gozan videlicet, et Haran, et Reseph, et filios Eden, qui erant in Thelassar?
{19:13} Ubi est rex Emath, et rex Arphad, et rex civitatis Sepharvaim, Ana, et Ava?
{19:14} Itaque cum accepisset Ezechias litteras de manu nunciorum, et legisset eas, ascendit in domum Domini, et expandit eas coram Domino,
{19:15} et oravit in conspectu eius, dicens: Domine Deus Israel, qui sedes super cherubim, tu es Deus solus regum omnium terrę: tu fecisti cęlum et terram.
{19:16} Inclina aurem tuam, et audi: aperi Domine oculos tuos, et vide: audi omnia verba Sennacherib, qui misit ut exprobraret nobis Deum viventem.
{19:17} Vere Domine dissipaverunt reges Assyriorum Gentes, et terras omnium.
{19:18} Et miserunt deos eorum in ignem: non enim erant dii, sed opera manuum hominum ex ligno et lapide, et perdiderunt eos.
{19:19} Nunc igitur Domine Deus noster, salvos nos fac de manu eius, ut sciant omnia regna terrę, quia tu es Dominus Deus solus.
{19:20} Misit autem Isaias filius Amos ad Ezechiam, dicens: Hęc dicit Dominus Deus Israel: Quę deprecatus es me super Sennacherib rege Assyriorum, audivi.
{19:21} Iste est sermo, quem locutus est Dominus de eo: Sprevit te, et subsannavit te virgo filia Sion: post tergum tuum caput movit, filia Ierusalem.
{19:22} Cui exprobrasti, et quem blasphemasti? contra quem exaltasti vocem tuam, et elevasti in excelsum oculos tuos? contra sanctum Israel.
{19:23} Per manum servorum tuorum exprobrasti Domino, et dixisti: In multitudine curruum meorum ascendi excelsa montium in summitate Libani, et succidi sublimes cedros eius, et electas abietes illius. Et ingressus sum usque ad terminos eius, et saltum carmeli eius
{19:24} ego succidi. Et bibi aquas alienas, et siccavi vestigiis pedum meorum omnes aquas clausas.
{19:25} Numquid non audisti quid ab initio fecerim? Ex diebus antiquis plasmavi illud, et nunc adduxi: eruntque in ruinam collium pugnantium civitates munitę.
{19:26} Et qui sedent in eis, humiles manu, contremuerunt et confusi sunt, facti sunt velut fnum agri, et virens herba tectorum, quę arefacta est antequam veniret ad maturitatem.
{19:27} Habitaculum tuum, et egressum tuum, et introitum tuum, et viam tuam ego pręscivi, et furorem tuum contra me.
{19:28} Insanisti in me, et superbia tua ascendit in aures meas: ponam itaque circulum in naribus tuis, et camum in labiis tuis, et reducam te in viam, per quam venisti.
{19:29} Tibi autem Ezechia hoc erit signum: Comede hoc anno quę repereris: in secundo autem anno, quę sponte nascuntur: porro in tertio anno seminate et metite: plantate vineas, et comedite fructum earum.
{19:30} Et quodcumque reliquum fuerit de domo Iuda, mittet radicem deorsum, et faciet fructum sursum.
{19:31} De Ierusalem quippe egredientur reliquię, et quod salvetur de monte Sion: zelus Domini exercituum faciet hoc.
{19:32} Quam ob rem hęc dicit Dominus de rege Assyriorum: Non ingredietur urbem hanc, nec mittet in eam sagittam, nec occupabit eam clypeus, nec circumdabit eam munitio.
{19:33} Per viam, qua venit, revertetur: et civitatem hanc non ingredietur, dicit Dominus.
{19:34} Protegamque urbem hanc, et salvabo eam propter me, et propter David servum meum.
{19:35} Factum est igitur in nocte illa, venit Angelus Domini, et percussit in castris Assyriorum centum octogintaquinque millia. Cumque diluculo surrexisset, vidit omnia corpora mortuorum: et recedens abiit,
{19:36} et reversus est Sennacherib rex Assyriorum, et mansit in Ninive.
{19:37} Cumque adoraret in templo Nesroch deum suum, Adramelech et Sarasar filii eius percusserunt eum gladio, fugeruntque in terram Armeniorum, et regnavit Asarhaddon filius eius pro eo.
[II Reges 20]
{20:1} In diebus illis ęgrotavit Ezechias usque ad mortem: et venit ad eum Isaias filius Amos, propheta, dixitque ei: Hęc dicit Dominus Deus: Pręcipe domui tuę: morieris enim tu, et non vives.
{20:2} Qui convertit faciem suam ad parietem, et oravit Dominum, dicens:
{20:3} Obsecro Domine, memento quęso quomodo ambulaverim coram te in veritate, et in corde perfecto, et quod placitum est coram te, fecerim. Flevit itaque Ezechias fletu magno.
{20:4} Et antequam egrederetur Isaias mediam partem atrii, factus est sermo Domini ad eum, dicens:
{20:5} Revertere, et dic Ezechię duci populi mei: Hęc dicit Dominus Deus David patris tui: Audivi orationem tuam, et vidi lacrymas tuas: et ecce sanavi te, die tertio ascendes templum Domini.
{20:6} Et addam diebus tuis quindecim annos: sed et de manu regis Assyriorum liberabo te, et civitatem hanc, et protegam urbem istam propter me, et propter David servum meum.
{20:7} Dixitque Isaias: Afferte massam ficorum. Quam cum attulissent, et posuissent super hulcus eius, curatus est.
{20:8} Dixerat autem Ezechias ad Isaiam: Quod erit signum, quia Dominus me sanabit, et quia ascensurus sum die tertia templum Domini?
{20:9} Cui ait Isaias: Hoc erit signum a Domino, quod facturus sit Dominus sermonem, quem locutus est: Vis ut ascendat umbra decem lineis, an ut revertatur totidem gradibus?
{20:10} Et ait Ezechias: Facile est, umbram crescere decem lineis: nec hoc volo ut fiat, sed ut revertatur retrorsum decem gradibus.
{20:11} Invocavit itaque Isaias propheta Dominum, et reduxit umbram per lineas, quibus iam descenderat in horologio Achaz, retrorsum decem gradibus.
{20:12} In tempore illo misit Berodach Baladan, filius Baladan, rex Babyloniorum litteras et munera ad Ezechiam: audierat enim quod ęgrotasset Ezechias.
{20:13} Lętatus est autem in adventu eorum Ezechias, et ostendit eis domum aromatum, et aurum et argentum, et pigmenta varia, unguenta quoque, et domum vasorum suorum, et omnia quę habere poterat in thesauris suis. Non fuit quod non monstraret eis Ezechias in domo sua, et in omni potestate sua.
{20:14} Venit autem Isaias propheta ad regem Ezechiam, dixitque ei: Quid dixerunt viri isti? aut unde venerunt ad te? Cui ait Ezechias: De terra longinqua venerunt ad me de Babylone.
{20:15} At ille respondit: Quid viderunt in domo tua? Ait Ezechias: Omnia quęcumque sunt in domo mea, viderunt: nihil est quod non monstraverim eis in thesauris meis.
{20:16} Dixit itaque Isaias Ezechię: Audi sermonem Domini:
{20:17} Ecce dies venient, et auferentur omnia, quę sunt in domo tua, et quę condiderunt patres tui usque in diem hanc, in Babylonem: non remanebit quidquam, ait Dominus.
{20:18} Sed et de filiis tuis qui egredientur ex te, quos generabis, tollentur, et erunt eunuchi in palatio regis Babylonis.
{20:19} Dixit Ezechias ad Isaiam: Bonus sermo Domini, quem locutus es: sit pax et veritas in diebus meis.
{20:20} Reliqua autem sermonum Ezechię, et omnis fortitudo eius, et quomodo fecerit piscinam, et aquęductum, et introduxerit aquas in civitatem, nonne hęc scripta sunt in Libro sermonum dierum regum Iuda?
{20:21} Dormivitque Ezechias cum patribus suis, et regnavit Manasses filius eius pro eo.
[II Reges 21]
{21:1} Duodecim annorum erat Manasses cum regnare cpisset, et quinquaginta quinque annis regnavit in Ierusalem: nomen matris eius Haphsiba.
{21:2} Fecitque malum in conspectu Domini, iuxta idola Gentium, quas delevit Dominus a facie filiorum Israel.
{21:3} Conversusque est, et ędificavit excelsa, quę dissipaverat Ezechias pater eius: et erexit aras Baal, et fecit lucos sicut fecerat Achab rex Israel, et adoravit omnem militiam cęli, et coluit eam.
{21:4} Extruxitque aras in domo Domini, de qua dixit Dominus: In Ierusalem ponam nomen meum.
{21:5} Et extruxit altaria universę militię cęli in duobus atriis templi Domini.
{21:6} Et traduxit filium suum per ignem: et ariolatus est, et observavit auguria, et fecit pythones, et aruspices multiplicavit, ut faceret malum coram Domino, et irritaret eum.
{21:7} Posuit quoque idolum luci, quem fecerat in templo Domini, super quod locutus est Dominus ad David, et ad Salomonem filium eius: In templo hoc, et in Ierusalem, quam elegi de cunctis tribubus Israel, ponam nomen meum in sempiternum.
{21:8} Et ultra non faciam commoveri pedem Israel de terra, quam dedi patribus eorum: si tamen custodierint opere omnia quę pręcepi eis, et universam legem, quam mandavit eis servus meus Moyses.
{21:9} Illi vero non audierunt: sed seducti sunt a Manasse, ut facerent malum super Gentes, quas contrivit Dominus a facie filiorum Israel.
{21:10} Locutusque est Dominus in manu servorum suorum Prophetarum, dicens:
{21:11} Quia fecit Manasses rex Iuda abominationes istas pessimas, super omnia quę fecerunt Amorrhęi ante eum, et peccare fecit etiam Iudam in immunditiis suis:
{21:12} propterea hęc dicit Dominus Deus Israel: Ecce ego inducam mala super Ierusalem et Iudam: ut quicumque audierit, tinniant ambę aures eius.
{21:13} Et extendam super Ierusalem funiculum Samarię, et pondus domus Achab: et delebo Ierusalem, sicut deleri solent tabulę: et delens vertam, et ducam crebrius stylum super faciem eius.
{21:14} Dimittam vero reliquias hereditatis meę, et tradam eas in manus inimicorum eius: eruntque in vastitatem, et in rapinam cunctis adversariis suis:
{21:15} eo quod fecerint malum coram me, et perseveraverint irritantes me, ex die qua egressi sunt patres eorum ex Ęgypto, usque ad hanc diem.
{21:16} Insuper et sanguinem innoxium fudit Manasses multum nimis, donec impleret Ierusalem usque ad os: absque peccatis suis, quibus peccare fecit Iudam, ut faceret malum coram Domino.
{21:17} Reliqua autem sermonum Manasse, ut universa quę fecit, et peccatum eius, quod peccavit, nonne hęc scripta sunt in Libro sermonum dierum regum Iuda?
{21:18} Dormivitque Manasses cum patribus suis, et sepultus est in horto domus suę, in horto Oza: et regnavit Amon filius eius pro eo.
{21:19} Viginti duorum annorum erat Amon cum regnare cpisset: duobus quoque annis regnavit in Ierusalem. nomen matris eius Messalemeth filia Harus de Ieteba.
{21:20} Fecitque malum in conspectu Domini, sicut fecerat Manasses pater eius.
{21:21} Et ambulavit in omni via, per quam ambulaverat pater eius: servivitque immunditiis, quibus servierat pater eius, et adoravit eas,
{21:22} et dereliquit Dominum Deum patrum suorum, et non ambulavit in via Domini.
{21:23} Tetenderuntque ei insidias servi sui, et interfecerunt regem in domo sua.
{21:24} Percussit autem populus terrę omnes, qui coniuraverant contra regem Amon: et constituerunt sibi regem Iosiam filium eius pro eo.
{21:25} Reliqua autem sermonum Amon quę fecit, nonne hęc scripta sunt in Libro sermonum dierum regum Iuda?
{21:26} Sepelieruntque eum in sepulchro suo, in horto Oza: et regnavit Iosias filius eius pro eo.
[II Reges 22]
{22:1} Octo annorum erat Iosias cum regnare cpisset, triginta et uno anno regnavit in Ierusalem: nomen matris eius Idida, filia Hadaia de Besecath.
{22:2} Fecitque quod placitum erat coram Domino, et ambulavit per omnes vias David patris sui: non declinavit ad dexteram, sive ad sinistram.
{22:3} Anno autem octavo decimo regis Iosię, misit rex Saphan filium Aslia, filii Messulam scribam templi Domini, dicens ei:
{22:4} Vade ad Helciam sacerdotem magnum, ut confletur pecunia, quę illata est in templum Domini, quam collegerunt ianitores templi a populo,
{22:5} deturque fabris per prępositos domus Domini: qui et distribuant eam his qui operantur in templo Domini, ad instauranda sartatecta templi:
{22:6} tignariis videlicet et cęmentariis, et iis, qui interrupta componunt: et ut emantur ligna, et lapides de lapicidinis ad instaurandum templum Domini.
{22:7} Verumtamen non supputetur eis argentum quod accipiunt, sed in potestate habeant, et in fide.
{22:8} Dixit autem Helcias pontifex ad Saphan scribam: Librum Legis reperi in domo Domini: deditque Helcias volumen Saphan, qui et legit illud.
{22:9} Venit quoque Saphan scriba ad regem, et renunciavit ei quod pręceperat, et ait: Conflaverunt servi tui pecuniam, quę reperta est in domo Domini: et dederunt ut distribueretur fabris a pręfectis operum templi Domini.
{22:10} Narravit quoque Saphan scriba regi, dicens: Librum dedit mihi Helcias sacerdos. Quem cum legisset Saphan coram rege,
{22:11} et audisset rex verba Libri Legis Domini, scidit vestimenta sua.
{22:12} Et pręcepit Helcię sacerdoti, et Ahicam filio Saphan, et Achobor filio Micha, et Saphan scribę, et Asaię servo regis, dicens:
{22:13} Ite et consulite Dominum super me, et super populo, et super omni Iuda, de verbis voluminis istius, quod inventum est: magna enim ira Domini succensa est contra nos: quia non audierunt patres nostri verba Libri huius, ut facerent omne quod scriptum est nobis.
{22:14} Ierunt itaque Helcias sacerdos, et Ahicam, et Achobor, et Sapham, et Asaia, ad Holdam prophetidem, uxorem Sellum filii Thecuę, filii Araas custodis vestium, quę habitabat in Ierusalem in Secunda: locutique sunt ad eam.
{22:15} Et illa respondit eis: Hęc dicit Dominus Deus Israel: Dicite viro, qui misit vos ad me:
{22:16} Hęc dicit Dominus: Ecce, ego adducam mala super locum istum, et super habitatores eius, omnia verba Legis quę legit rex Iuda:
{22:17} quia dereliquerunt me, et sacrificaverunt diis alienis, irritantes me in cunctis operibus manuum suarum: et succendetur indignatio mea in loco hoc, et non extinguetur.
{22:18} Regi autem Iuda, qui misit vos ut consuleretis Dominum, sic dicetis: Hęc dicit Dominus Deus Israel: Pro eo quod audisti verba voluminis,
{22:19} et perterritum est cor tuum, et humiliatus es coram Domino, auditis sermonibus contra locum istum, et habitatores eius, quod videlicet fierent in stuporem et in maledictum: et scidisti vestimenta tua, et flevisti coram me, et ego audivi, ait Dominus:
{22:20} idcirco colligam te ad patres tuos, et colligeris ad sepulchrum tuum in pace, ut non videant oculi tui omnia mala quę inducturus sum super locum istum.
[II Reges 23]
{23:1} Et renunciaverunt regi quod dixerat. Qui misit: et congregati sunt ad eum omnes senes Iuda et Ierusalem.
{23:2} Ascenditque rex templum Domini, et omnes viri Iuda, universique qui habitabant in Ierusalem cum eo sacerdotes et prophetę, et omnis populus a parvo usque ad magnum: legitque cunctis audientibus omnia verba libri fderis, qui inventus est in domo Domini.
{23:3} Stetitque rex super gradum: et fdus percussit coram Domino, ut ambularent post Dominum, et custodirent pręcepta eius, et testimonia, et ceremonias in omni corde, et in tota anima, et suscitarent verba fderis huius, quę scripta erant in libro illo: acquievitque populus pacto.
{23:4} Et pręcepit rex Helcię pontifici, et sacerdotibus secundi ordinis, et ianitoribus, ut proiicerent de templo Domini omnia vasa, quę facta fuerant Baal, et in luco, et universę militię cęli: et combussit ea foris Ierusalem in Convalle cedron, et tulit pulverem eorum in Bethel.
{23:5} Et delevit aruspices, quos posuerant reges Iuda ad sacrificandum in excelsis per civitates Iuda, et in circuitu Ierusalem: et eos, qui adolebant incensum Baal, et Soli, et Lunę, et duodecim signis, et omni militię cęli.
{23:6} Et efferri fecit lucum de domo Domini foras Ierusalem in Convalle cedron, et combussit eum ibi, et redegit in pulverem, et proiecit super sepulchra vulgi.
{23:7} Destruxit quoque ędiculas effeminatorum, quę erant in domo Domini, pro quibus mulieres texebant quasi domunculas luci.
{23:8} Congregavitque omnes sacerdotes de civitatibus Iuda: et contaminavit excelsa, ubi sacrificabant sacerdotes de Gabaa usque Bersabee: et destruxit aras portarum in introitu ostii Iosue principis civitatis, quod erat ad sinistram portę civitatis.
{23:9} Verumtamen non ascendebant sacerdotes excelsorum ad altare Domini in Ierusalem: sed tantum comedebant azyma in medio fratrum suorum.
{23:10} Contaminavit quoque Topheth, quod est in Convalle filii Ennom: ut nemo consecraret filium suum aut filiam per ignem, Moloch.
{23:11} Abstulit quoque equos, quos dederant reges Iuda, Soli, in introitu templi Domini iuxta exedram Nathanmelech eunuchi, qui erat in Pharurim: currus autem Solis combussit igni.
{23:12} Altaria quoque, quę erant super tecta cnaculi Achaz, quę fecerant reges Iuda, et altaria quę fecerat Manasses in duobus atriis templi Domini, destruxit rex: et cucurrit inde, et dispersit cinerem eorum in Torrentem cedron.
{23:13} Excelsa quoque, quę erant in Ierusalem ad dexteram partem Montis offensionis, quę ędificaverat Salomon rex Israel Astaroth idolo Sidoniorum, et Chamos offensioni Moab, et Melchom abominationi filiorum Ammon, polluit rex.
{23:14} Et contrivit statuas, et succidit lucos: replevitque loca eorum ossibus mortuorum.
{23:15} Insuper et altare, quod erat in Bethel, et excelsum, quod fecerat Ieroboam filius Nabat, qui peccare fecit Israel: et altare illud, et excelsum destruxit, atque combussit, et comminuit in pulverem, succenditque etiam lucum.
{23:16} Et conversus Iosias, vidit ibi sepulchra, quę erant in monte: misitque et tulit ossa de sepulchris, et combussit ea super altare, et polluit illud iuxta verbum Domini, quod locutus est vir Dei, qui prędixerat verba hęc.
{23:17} Et ait: Quis est titulus ille, quem video? Responderuntque ei cives urbis illius: Sepulchrum est hominis Dei, qui venit de Iuda, et prędixit verba hęc, quę fecisti super altare Bethel.
{23:18} Et ait: Dimitte eum, nemo commoveat ossa eius. Et intacta manserunt ossa illius cum ossibus prophetę, qui venerat de Samaria.
{23:19} Insuper et omnia fana excelsorum, quę erant in civitatibus Samarię, quę fecerant reges Israel ad irritandum Dominum, abstulit Iosias: et fecit eis secundum omnia opera, quę fecerat in Bethel.
{23:20} Et occidit universos sacerdotes excelsorum, qui erant ibi super altaria: et combussit ossa humana super ea: reversusque est Ierusalem.
{23:21} Et pręcepit omni populo, dicens: Facite Phase Domino Deo vestro, secundum quod scriptum est in libro fderis huius.
{23:22} Nec enim factum est Phase tale a diebus iudicum, qui iudicaverunt Israel, et omnium dierum regum Israel, et regum Iuda,
{23:23} sicut in octavo decimo anno regis Iosię factum est Phase istud Domino in Ierusalem.
{23:24} Sed et pythones, et ariolos, et figuras idolorum, et immunditias, et abominationes, quę fuerant in terra Iuda et Ierusalem, abstulit Iosias: ut statueret verba legis, quę scipta sunt in Libro, quem invenit Helcias sacerdos in templo Domini.
{23:25} Similis illi non fuit ante eum rex, qui reverteretur ad Dominum in omni corde suo, et in tota anima sua, et in universa virtute sua iuxta omnem legem Moysi: neque post eum surrexit similis illi.
{23:26} Verumtamen non est aversus Dominus ab ira furoris sui magni, quo iratus est furor eius contra Iudam: propter irritationes, quibus provocaverat eum Manasses.
{23:27} Dixit itaque Dominus: Etiam Iudam auferam a facie mea, sicut abstuli Israel: et proiiciam civitatem hanc, quam elegi Ierusalem, et domum, de qua dixi: Erit nomen meum ibi.
{23:28} Reliqua autem sermonum Iosię, et universa quę fecit, nonne hęc scripta sunt in Libro verborum dierum regum Iuda?
{23:29} In diebus eius ascendit Pharao Nechao rex Ęgypti, contra regem Assyriorum ad flumen Euphraten: et abiit Iosias rex in occursum eius: et occisus est in Mageddo, cum vidisset eum.
{23:30} Et portaverunt eum servi sui mortuum de Mageddo: et pertulerunt in Ierusalem, et sepelierunt eum in sepulchro suo. Tulitque populus terrę Ioachaz filium Iosię: et unxerunt eum, et constituerunt eum regem pro patre suo.
{23:31} Viginti trium annorum erat Ioachaz cum regnare cpisset, et tribus mensibus regnavit in Ierusalem: nomen matris eius Amital, filia Ieremię, de Lobna.
{23:32} Et fecit malum coram Domino, iuxta omnia quę fecerant patres eius.
{23:33} Vinxitque eum Pharao Nechao in Rebla, quę est in terra Emath, ne regnaret in Ierusalem: et imposuit mulctam terrę centum talentis argenti, et talento auri.
{23:34} Regemque constituit Pharao Nechao Eliacim filium Iosię pro Iosia patre eius: vertitque nomen eius Ioakim. porro Ioachaz tulit, et duxit in Ęgyptum, et mortuus est ibi.
{23:35} Argentum autem, et aurum dedit Ioakim Pharaoni cum indixisset terrę per singulos, ut conferretur iuxta pręceptum Pharaonis: et unumquemque iuxta vires suas exegit, tam argentum quam aurum de populo terrę: ut daret Pharaoni Nechao.
{23:36} Vigintiquinque annorum erat Ioakim cum regnare cpisset: et undecim annis regnavit in Ierusalem: nomen matris eius Zebida filia Phadaia de Ruma.
{23:37} Et fecit malum coram Domino iuxta omnia, quę fecerant patres eius.
[II Reges 24]
{24:1} In diebus eius ascendit Nabuchodonosor rex Babylonis, et factus est ei Ioakim servus tribus annis: et rursum rebellavit contra eum.
{24:2} Immisitque ei Dominus latrunculos Chaldęorum, et latrunculos Syrię, et latrunculos Moab, et latrunculos filiorum Ammon: et immisit eos in Iudam, ut disperderent eum, iuxta verbum Domini, quod locutus fuerat per servos suos prophetas.
{24:3} Factum est autem hoc per verbum Domini contra Iudam, ut auferret eum coram se propter peccata Manasse universa quę fecit,
{24:4} et propter sanguinem innoxium, quem effudit, et implevit Ierusalem cruore innocentium: et ob hanc rem noluit Dominus propitiari.
{24:5} Reliqua autem sermonum Ioakim, et universa quę fecit, nonne hęc scripta sunt in Libro sermonum dierum regum Iuda? Et dormivit Ioakim cum patribus suis:
{24:6} et regnavit Ioachin filius eius pro eo.
{24:7} Et ultra non addidit rex Ęgypti, ut egrederetur de terra sua: tulerat enim rex Babylonis a rivo Ęgypti usque ad fluvium Euphraten, omnia quę fuerant regis Ęgypti.
{24:8} Decem et octo annorum erat Ioachin cum regnare cpisset, et tribus mensibus regnavit in Ierusalem: nomen matris eius Nohesta filia Elnathan de Ierusalem.
{24:9} Et fecit malum coram Domino, iuxta omnia quę fecerat pater eius.
{24:10} In tempore illo ascenderunt servi Nabuchodonosor regis Babylonis in Ierusalem, et circumdata est urbs munitionibus.
{24:11} Venitque Nabuchodonosor rex Babylonis ad civitatem cum servis suis ut oppugnarent eam.
{24:12} Egressusque est Ioachin rex Iuda ad regem Babylonis, ipse et mater eius, et servi eius, et principes eius, et eunuchi eius: et suscepit eum rex Babylonis anno octavo regni sui.
{24:13} Et protulit inde omnes thesauros domus Domini, et thesauros domus regię: et concidit universa vasa aurea, quę fecerat Salomon rex Israel in templo Domini iuxta verbum Domini.
{24:14} Et transtulit omnem Ierusalem, et universos principes, et omnes fortes exercitus, decem millia, in captivitatem: et omnem artificem et clusorem: nihilque relictum est, exceptis pauperibus populi terrę.
{24:15} Transtulit quoque Ioachin in Babylonem, et matrem regis, et uxores regis, et eunuchos eius: et iudices terrę duxit in captivitatem de Ierusalem in Babylonem.
{24:16} Et omnes viros robustos, septem millia, et artifices, et clusores mille, omnes viros fortes et bellatores: duxitque eos rex Babylonis captivos in Babylonem.
{24:17} Et constituit Matthaniam patruum eius pro eo: imposuitque nomen ei Sedeciam.
{24:18} Vigesimum et primum annum ętatis habebat Sedecias cum regnare cpisset, et undecim annis regnavit in Ierusalem: nomen matris eius erat Amital, filia Ieremię de Lobna.
{24:19} Et fecit malum coram Domino, iuxta omnia quę fecerat Ioakim.
{24:20} Irascebatur enim Dominus contra Ierusalem et contra Iudam, donec proiiceret eos a facie sua: recessitque Sedecias a rege Babylonis.
[II Reges 25]
{25:1} Factum est autem anno nono regni eius, mense decimo, decima die mensis, venit Nabuchodonosor rex Babylonis, ipse et omnis exercitus eius in Ierusalem, et circumdederunt eam: et extruxerunt in circuitu eius munitiones.
{25:2} Et clausa est civitas atque vallata usque ad undecimum annum regis Sedecię,
{25:3} nona die mensis: pręvaluitque fames in civitate, nec erat panis populo terrę.
{25:4} Et interrupta est civitas: et omnes viri bellatores nocte fugerunt per viam portę, quę est inter duplicem murum ad hortum regis (porro Chaldęi obsidebant in circuitu civitatem) fugit itaque Sedecias per viam, quę ducit ad campestria solitudinis.
{25:5} Et persecutus est exercitus Chaldęorum regem, comprehenditque eum in planitie Iericho: et omnes bellatores, qui erant cum eo, dispersi sunt, et reliquerunt eum.
{25:6} Apprehensum ergo regem duxerunt ad regem Babylonis in Reblatha: qui locutus est cum eo iudicium.
{25:7} Filios autem Sedecię occidit coram eo, et oculos eius effodit, vinxitque eum catenis, et adduxit in Babylonem.
{25:8} Mense quinto, septima die mensis, ipse est annus nonus decimus regis Babylonis: venit Nabuzardan princeps exercitus, servus regis Babylonis, in Ierusalem.
{25:9} Et succendit domum Domini, et domum regis: et domos Ierusalem, omnemque domum combussit igni.
{25:10} Et muros Ierusalem in circuitu destruxit omnis exercitus Chaldęorum, qui erat cum principe militum.
{25:11} Reliquam autem populi partem, quę remanserat in civitate, et perfugas, qui transfugerant ad regem Babylonis, et reliquum vulgus transtulit Nabuzardan princeps militię.
{25:12} Et de pauperibus terrę reliquit vinitores et agricolas.
{25:13} Columnas autem ęreas, quę erant in templo Domini, et bases, et mare ęreum, quod erat in domo Domini, confregerunt Chaldęi, et transtulerunt ęs omne in Babylonem.
{25:14} Ollas quoque ęreas, et trullas, et tridentes, et scyphos, et mortariola, et omnia vasa ęrea, in quibus ministrabant, tulerunt.
{25:15} Necnon et thuribula, et phialas: quę aurea, aurea: et quę argentea, argentea tulit princeps militię,
{25:16} id est, columnas duas, mare unum, et bases quas fecerat Salomon in templo Domini: non erat pondus ęris omnium vasorum.
{25:17} Decem et octo cubitos altitudinis habebat columna una: et capitellum ęreum super se altitudinis trium cubitorum: et retiaculum, et malogranata super capitellum columnę, omnia ęrea: similem et columna secunda habebat ornatum.
{25:18} Tulit quoque princeps militię Saraiam sacerdotem primum, et Sophoniam sacerdotem secundum, et tres ianitores.
{25:19} Et de civitate eunuchum unum, qui erat pręfectus super bellatores viros: et quinque viros de his, qui steterant coram rege, quos reperit in civitate: et Sopher principem exercitus, qui probabat tyrones de populo terrę: et sexaginta viros e vulgo, qui inventi fuerant in civitate.
{25:20} Quos tollens Nabuzardan princeps militum, duxit ad regem Babylonis in Reblatha.
{25:21} Percussitque eos rex Babylonis, et interfecit eos in Reblatha in terra Emath: et translatus est Iuda de terra sua.
{25:22} Populo autem, qui relictus erat in Terra Iuda, quem dimiserat Nabuchodonosor rex Babylonis, pręfecit Godoliam filium Ahicam filii Saphan.
{25:23} Quod cum audissent omnes duces militum, ipsi et viri qui erant cum eis, videlicet quod constituisset rex Babylonis Godoliam: venerunt ad Godoliam in Maspha, Ismahel filius Nathanię, et Iohanan filius Caree, et Saraia filius Thanehumeth Netophathites, et Iezonias filius Maachathi, ipsi et socii eorum.
{25:24} Iuravitque Godolias ipsis et sociis eorum, dicens: Nolite timere servire Chaldęis: manete in terra, et servite regi Babylonis, et bene erit vobis.
{25:25} Factum est autem in mense septimo, venit Ismahel filius Nathanię, filii Elisama de semine regio, et decem viri cum eo: percusseruntque Godoliam, qui et mortuus est: sed et Iudęos et Chaldęos, qui erant cum eo in Maspha.
{25:26} Consurgensque omnis populus a parvo usque ad magnum, et principes militum venerunt in Ęgyptum timentes Chaldęos.
{25:27} Factum est vero in anno trigesimo septimo transmigrationis Ioachin regis Iuda, mense duodecimo, vigesima septima die mensis: sublevavit Evilmerodach rex Babylonis, anno, quo regnare cperat, caput Ioachin regis Iuda de carcere.
{25:28} Et locutus est ei benigne: et posuit thronum eius super thronum regum, qui erant cum eo in Babylone.
{25:29} Et mutavit vestes eius, quas habuerat in carcere, et comedebat panem semper in conspectu eius cunctis diebus vitę suę.
{25:30} Annonam quoque constituit ei sine intermissione, quę et dabatur ei a rege per singulos dies omnibus diebus vitę suę.